Xitay shirkitining chet'el ündidar abuntlirini nazaret qilip, xitay hökümitige yardemlishidighanliqi ilgiri sürüldi

Xitay téxnologiye guruhi téngshün shirkitining chet'ellik ündidar abuntlirini nazaret qilip, xitay hökümitining tekshürüshige yardemlishidighanliqi ilgiri sürüldi.

Kanadaning toronto uniwérsitéti qarmiqidiki “Grazhdanlar laboratoriyesi” namliq tetqiqat merkizining 7-may élan qilghan doklatida tekitlinishiche, xitayda royxetke élinmighan ündidar hésabliridiki höjjet we körünüshler nazaret qilinip, ündidar sanliq ambéri qurush üchün ishlitilidiken. Doklatta ündidarning bu sanliq melumatlarni xitayda royxetke élin'ghan ündidar hésablirini sénzorlashta ishlitidighanliqi ilgiri sürülgen.

Ündidar dunyadiki abunti eng köp ijtima'iy alaqe wasitilirining biri bolup, uning dunya miqyasida bir milyard abunti bar iken. Mezkur ijtima'iy alaqe wasitisi 2017-yili chong tutqun bashlinishtin burun chet'eldiki Uyghurlarning yurti bilen alaqe qilidighan eng muhim alaqe wasitisi bolup kelgen. Gerche chong tutqundin kéyin chet'eldiki Uyghurlarda ündidarni ishlitidighanlar azayghan bolsimu, lékin bu hazirmu yenila bir qisim Uyghurlarning a'ilisi bilen alaqilishidighan muhim alaqe wasitisidur.

Amérika CNBC téléwiziye qanilining xewer qilishiche, ular téngshün shirkiti bilen alaqileshken bolsimu, lékin mezkur shirket bu doklatqa inkas bildürüshni ret qilghan. Bu doklat amérikada xitay shirketlirining hamiliqidiki yumtal we mulazimetlerning sanliq melumat éqishigha qarita endishe künséri küchiyiwatqan mezgilde élan qilindi. CNBC Ning xewiride tekitlishiche, bu doklat xitay shirketlirining dölet chégrasidin halqip, xelq'ara abuntlirining yollanmilirini nazaret qiliwatqnaliqini körsitip béridiken.