Ündidarning abontlarning pa'aliyetlirini aptomatik xatirilep saqchi organlirigha ewetidighanliqi ashkarilan'ghan

Xitayning ijtima'iy alaqe epi bolghan ündidarning abontlarning pa'aliyiti aptomatik halda xatirilep mangidighanliqi we uni qanun ijra qilghuchi organlar bilen hembehirleydighanliqi ashkarilan'ghan.

“Xitay digital waqti” namliq tor betning xewer qilishiche, yéqinda qaramay sheherlik edliye idarisi xitaydiki tik-tok, yeni “Dowyin” de tarqatqan bir widiyosida ündidargha yuqiriqidek iqtidarning qoshulghanliqi medhiyelen'gen bir widiyo tarqatqan. Bu widiyo küchlük diqqet qozghighandin kéyin, qaramay sheherlik edliye idarisi derhal bu widiyoni öchürüwetken.

Xewerge qarighanda, widiyoda yer alghan saqchi xadimi ündidar epining abontlarning pa'aliyitini aptomatik xatirileydighanliqi, eger qanunsiz birer söz-heriket bayqalghanda uni derhal ékran süritige tartip qanun ijra qilghuchi organlargha ewetidighanliqini bildürgen. U yene, qanunsiz matériyallarni ündidardin öchürüwétishning mumkin bolmaydighanliqini eskertip, abontlarni “Qanunsiz heriketler” bilen shughullinishtin agahlandurghan.

 “Xitay digital waqti” torining körsitishiche, xitayning ündidar epining abontlarning paranglirini algorizim arqiliq nazaret qilish we tekshürüsh iqtidarining barliqi burunla ashkarilan'ghan bolsimu, biraq uning abontlarning herikitini neq shu waqtining özide nazaret qilishi we süretke tartip saqchi organlirigha ewetish iqtidarigha ige ikenliki bir yéngiliq bolup hésablinidiken.

 “Wichat” (ündidar) supisi pütün dunyada xitaylar eng köp qollinidighan alaqe supisi bolup, amérika dölet mejlisi we musteqil tetqiqat organliri xitayning ündidar we tik-tok qatarliq eplirining emeliyette xitay kompartiyesining sanliq melumat oghrilash, puqralarni nazaret qilish, xitay kompartiyesini teshwiq qilish we xata uchur tarqitish wasitisi ikenlikini eskertip kelmekte.