Уйғур диярида маска тақимай талаға чиқиш чәкләнсиму, лекин сода вә саяһәт тәшвиқ қилинмақта

Мухбиримиз әркин
2020-03-30
Елхәт
Пикир
Share
Принт

Уйғур диярида пуқраларниң маска тақимай талаға чиқиши чәкләнсиму, лекин даириләр сода вә саяһәтниң әслигә кәлгәнликини кәң көләмдә тәшвиқ қилмақта.

Хитай даирилири өткән һәптә районда киноханиларниң ечилғанлиқини елан қилған. Мутәхәссисләр буниң «зор тәвәккүлчилик» икәнликини тәкитлигән иди. Лекин бу һәптә даириләр районда сода нуқтилириниң ечилип, саяһәтниң әслигә кәлгәнлики, саяһәт нуқтилириниң қайта «қайнам-ташқинлиққа чөмгәнлики» ни илгири сүрди. Шинхуа агентлиқиниң қәйт қилишичә, нөвәттә саяһәтчиләрниң муһим сода қилиш нуқтилириниң бири болған үрүмчи дөңкөврүктики чоң базар саяһәтчиләргә ечиветилип, «нәғмә-нава» вә қайта «қайнам-ташқинлиққа чөмгән.»

Лекин маска тақап, «нәғмә-нава» қиливатқан пуқраларниң қанчисиниң саяһәтчи, қанчисиниң һөкүмәт орунлаштурған «нәғмә-навачилар» икәнлики мәлум әмәс. Охшаш бир вақитта һәр қайси наһийәләрдә йәрлик даириләр пуқраларни чечәк байрамлириға тәшкилләп, вирусниң контрол қилинғанлиқи, саяһәтниң әслигә кәлгәнликини намаян қилишқа тиришмақтикән.

Бүгүр наһийәсидә өткүзүлгән «өрүк чечики» байрими әнә шундақ паалийәтләрниң бири. Хитайдики «җуңго хәвәрлири» ториниң хәвәр қилишичә, чечәк байрими бүгүрдики 6000 молуқ бир өрүклүк бағда өткүзүлгән болуп, униңға идарә-җәмийәтләр сәпәрвәр қилинғанлиқи мәлум.

Көзәткүчиләрниң илгири сүрүшичә, йәрлик даириләр корона вирусиниң контрол қилинип, районда вәзийәтниң нормал әһвалға қайтқанлиқини намаян қилишқа тиришсиму, лекин кишиләрни сиясий вәзийәт һәм корона вирусиниң вәһимиси чулғивалғанлиқи көрүнүп туридикән. Шинхуа агентлиқиниң хәвиридә районда кишиләрниң маска тақап йүрүши, аммиви сорунларда бәдән тәмпературисини тәкшүрүшниң йәнила йолға қоюлуватқанлиқи, кишиләрниң бир-бири билән алақә қилғанда йерим метир арилиқ сақлиши тәләп қилинидиғанлиқи илгири сүрүлгән.

Пикирләр (0)
Share
Толуқ бәт