Германийәдә хизмәт зияритидә болуватқан хитай ташқи ишлар министири ваң йи шу җайдики ахбарат елан қилиш йиғинида «уйғурлардин ‹кәспий тәрбийәләш мәркизи'дә оқуватқанларниң һәммиси әсәбийлик вә террорлуқ идийәлириниң зәһәрлишидин халас болуп, җәмийәт қойниға қайтип кәлди. Һазир у җайларда һечким қалмиди» дегәндин кейин ахбарат саһәсиниң соаллириға көмүлүп кәтти.
Зиярәт җәрянида германийә ташқи ишлар министири хайко мас өзлириниң хоңкоң вә уйғурларниң вәзийитидин бәкму әндишә қиливатқанлиқини билдүргән һәмдә ваң йидин уйғурлар дияридики лагерлар мәсилиси һәққидә соал сориған. Сөһбәттә ваң йи йәнә бир қетим «уйғурлар мәсилиси бизниң ички ишимиз. Хәлқараниң буниңға арилишиш һәққи йоқ» дегән. Хайко мас бу һәқтә әһвал тонуштуруп «мән униңдин қайта-қайтилап бирләшкән дөләтләр тәшкилати (б д т) тәкшүргүчилириниң лагерларни тәкшүрүшигә йол қоюшни соридим» дегән.
«Әл җәзирә» қанилиниң 1-сентәбирдики хәвиридә ейтилишичә, буниңдин бирнәччә күн илгири чех җумһурийити вәкилләр өмики тәйвәнни зиярәт қилғандин кейин ваң йи «чех һөкүмити бу қилмиши үчүн бәдәл төләйду» дегән. Хайко мас бу һәқтә тохтилип, хитай ташқи ишлар министирлиқи ейтқан бу сөзләрниң дипломатийә йосуниға чүшмәйдиған «тәһдит» икәнликини, явропа иттипақида өзара баравәрлик вә һөрмәтниң асас қилинидиғанлиқини тәкитлигән.
«Фирансийә хәвәр агентлиқи» ниң 1-сентәбирдики хәвиридә ейтилишичә, ваң йи зиярәткә кәлгән күни германийә ташқи ишлар министирлиқиниң сиртида уйғурлар вә хоңкоң демократийәсини қоллиғучиларниң зор көләмлик наразилиқ намайишиға дуч кәлгән. Дуня уйғур қурултийи (д у қ)ниң рәиси долқун әйса бу һәқтә сөз қилип «ваң йиниң ‹лагерлар тақалди. Һазир у җайда һечким қалмиди' дегән сөзлири қипқизил ялған. Улар кона муқам бойичә йәнә бир қетим көз боямчилиқ қилип дуняни алдимақчи болуватиду» деди.
