FBI Ниң башлиқи: ковид вируси вухәндики тәҗрибиханидин чиққан болуши мумкин

Америка федератсийә тәкшүрүш идариси (FBI) ниң башлиқи кристофер врай (Christopher Wray) 2-айниң 28-күни елан қилған сөзидә, ковид вирусиниң хитайдики тәҗрибиханидин ямриған болуши мумкинликини ейтқан. Бу, америка федратсийә тәкшүрүш идарисиниң ковид вирусиниң тарқилиш мәнбәсини җамаәткә тунҗи қетим елан қилиши һесаблинидикән.

2020-Йил хитайдин башланған ковид юқуми пүтүн дуняда 7 милйонға йеқин инсанниң өлүмигә сәвәб болғаниди.

“вол-стрет журнили” гезитидә елан қилинған хәвәргә көрә, кристофер врай америкадики “фокс хәвәрлири” мухбириниң зияритини қобул қилғанда мундақ дегән: “америка федератсийә тәкшүрүш идариси узун мәзгил тәкшүрүш арқилиқ, ‛ковид вируси бүйүк еһтималда вухәндики тәҗрибиханидин ямриған‚ дегән қарашқа кәлди. Бу йәрдә хитай һөкүмити контрол қиливалған тәҗрибиханиниң мәхпийәтлики мәсилиси бар. Америка федератсийә тәкшүрүш идариси америка һөкүмитиниң башқа органлири вә чәт әл билән һәмкарлишип, ковид вирусиниң мәнбәсини тәкшүрмәкчи болғанда хитай һөкүмити җан-җәһли билән тосқунлуқ қилип кәлди, пакитларни елиштурувәтти. Әмма хизмитимиз һелиһәм давам қилмақта”.

Америка федратсийә тәкшүрүш идарисиниң тивиттер һесабида кристофер врайниң “FBI ниң мөлчәричә, ковид вируси вухәндики тәҗрибиханидин тарқилип кәткән болуши мумкин” дегән сөзигә яндаш һалда, хитай һөкүмитиниң бу вирусни тәкшүрүшкә изчил тосқунлуқ қилип кәлгәнлики, әмма тәкшүрүшниң йәнила давамлишиватқанлиқи билдүрүлгән.

“вол стрет журнили” гезитиниң хәвиридә ейтилишичә, америка ениргийә министирлики FBI ниң тәкшүрүш нәтиҗисигә қошулған болуп, 2021-йилниң бешидики гуманий мәйданини өзгәрткән. FBI Билән америка ениргийә министирлики ақсарайға вә бәзи дөләт мәҗлиси әзалириға бу һәқтә мәхпий доклат сунған. Әмма бу доклатни оқуғанлар ичидә бәзилири ковид вирусиниң вухән тәҗрибиханисидин чиққанлиқи яки һайванлардин инсанларға таралғанлиқи һәққидә ениқ бир пикиргә келәлмигән.