Америка хәлқара диний әркинлик комитети америка һөкүмитини уйғур мәсилисини сода сөһбити билән бирләштүрүшкә чақирди

Мухбиримиз әркин
2019-05-10
Елхәт
Пикир
Share
Принт

Америка хәлқара диний әркинлик комитети 10‏-май баянат елан қилип, америка һөкүмитини уйғурларни өз ичигә алған диний әркинлик вә кишилик һоқуқ мәсилисини хитай билән өткүзүватқан сода сөһбити билән бирләштүрүшкә чақирған.

Баянатта трамп һөкүмитиниң хитайда диний җамаәтләрниң җазалашқа учраватқанлиқ мәсилисини вашингтонда зиярәттә болуватқан хитайниң муавин баш министири лю хе билән сөзлишиши тәләп қилинған. Баянатта йәнә америка дөләт мудапийә министирлиқиниң сөзи нәқил кәлтүрүлүп, «хитай һөкүмитиниң шинҗаңдики уйғур вә башқа мусулманлардин 3 милйондәк кишини тутқун қилғанлиқи» ни тәкитләнгән. Бу, америка дөләт мудапийә министирлиқидин кейин хитайниң 3 милйондәк уйғурни лагерларға қамиғанлиқини тилға алған иккинчи бир америка һөкүмәт органидур.

Америка дөләт мудапийә министирлиқиниң ярдәмчи министири рәнди шрайвер йеқинда хитайниң 3 милйондәк уйғур вә башқа түркий тиллиқ мусулманларни «йиғивелиш лагерлири» ға қамиғанлиқини илгири сүргән. Бу хәлқара таратқуларда зор ғулғула қозғиған иди.

Баянатта йәнә мәзкур комитетниң комиссари гәрий бәер «нөвәттә хитай коммунист һөкүмитиниң елип бериватқан барлиқ динларни хитайчилаштуруш һәрикити, бүгүнки күндә йүз бериватқан диний әркинликни әң еғир дәпсәндә қилиш һадисиси»» икәнликини тәкитлигән. У мундақ дегән: «хитай билән болған сода мунасивити һәққидики бу қетимқи сөһбәттә динларниң бастурулуши вә кишилик һоқуқ мәсилиси сөһбәт күнтәртипигә елиниши керәк. Бу мәйли мусулман, мәйли буддист, мәйли хрисиян яки фалунгоң муритлири болсун, һәр бир әр вә һәр бир аялиниң өзи халиған шәкилдә ибадәт қилиштин ибарәт һәқ-һоқуқ мәсилисидур. Хитайдики милйонлиған хәлқниң һаяти вә әркинлики өз һөкүмитиниң һуҗумиға учраватқан әһвалда биз диний әркинлик вә кишилик һоқуқни униң күнтәртипигә елип киришимиз керәк.»

Америка хәлқара диний әркинлик комитети өткән һәптә елан қилған йиллиқ доклатида америка һөкүмитигә хитайни «диний әркинлики алаһидә көзитилидиған дөләтләр тизимлики» гә киргүзүшни, шуниңдәк чен чүәнго қатарлиқ хитай әмәлдарлириға җаза қоюшни тәклип қилған иди.

Пикирләр (0)
Share
Толуқ бәт