Хәлқара кәчүрүм тәшкилати: америка хитайдики уйғурларни қоғдашта тарихий қәдәм ташлиди

Мухбиримиз нуриман
2020-06-19
Елхәт
Пикир
Share
Принт

Президент трамп 17-июн 2020-йиллиқ уйғур кишилик һоқуқ сиясити қанун лайиһәсигә имза қоюп рәсмий қанунлаштурди. Американиң бейҗиңда турушлуқ әлчиханиси ашу күни хитайчә баянат елан қилип уйғур кишилик һоқуқ сияситиниң қанунлашқанлиқини хитай һөкүмитигә рәсмий уқтурди. Америка һөкүмитиниң уйғур кишилик һоқуқ қанунини рәсмий қанунлаштуруши вә буниңдин кейин бу қанунни иҗра қилидиғанлиқини билдүрүши хитайни қаттиқ сарасимға салған болуп, хитай һөкүмити буниңға қарши өзини ақлаш вә американи әйибләшкә киришти.

Хитай һөкүмитиниң дөләтлик телевизийәси американиң «2020-йиллиқ уйғур кишилик һоқуқ сиясити қанун лайиһәси» ни рәсмий қанунлаштурушини «узун биләклик маймунларниң хитайни қалаймиқанлаштуруш үчүн қолланған оюни» дегән һақарәтлик сөзләр билән күчлүк наразилиқини ипадилиди.

Бу қанунниң рәсмий имзалиниши хәлқаралиқ кишилик һоқуқ тәшкилатлири, уйғур тәшкилатлири вә кәң уйғурларниң алқишиға еришкән болуп, америкадики хәлқара кәчүрүм тәшкилатиниң тәшвиқат вә һөкүмәт ишлириға мәсул директори җоан лин баянат елан қилип: президент трампниң. Имза қоюшини «уйғурларни қоғдаштики тарих бир қәдәм» дәп атиди.

Баянатта йәнә мундақ дейилгән: «бу тарихий характерлик қанун арқилиқ, америка һөкүмити уйғурларни қийнаш, тутқун қилиш, узун муддәт қанунсиз тутуп туруш қилмишлири вә башқа кишилик һоқуққа дәхли-тәриз қилған шәхсләрни ениқлап чиқип, уларға җаза тәдбирлири қоллиниду.»

Хәлқара кәчүрүм тәшкилати 2017-йилидин буян уйғурларниң лагерларға қамилиши, хитайниң уйғурларға йүргүзгән дәһшәтлик қийин-қистақлири вә муһаҗирәттики уйғурларға тәһдит селиш қилмишлириға аит нурғун учурларни тәкшүрүп, ениқлап чиқип дуняға ашкарилиғаниди.

Пикирләр (0)
Share
Толуқ бәт