Бир хитай һәрбий офитсери виза алдамчилиқи билән америкида қолға елинған

Мухбиримиз җүмә
2020-06-14

Бир хитай һәрбий офитсери виза алдамчилиқи билән америкида қолға елинған. Әгәр униң җинайити дәлилләнсә 10 йиллиқ кесилиши мумкин икән.

Бу һәқтики хәвәрләргә қариғанда, ваң шин исимлик мәзкур хадим хитай азадлиқ армийәсиниң майор дәриҗилики офитсери болуп, у санфриансиско шәһиридики калифорнийә университетиға тәтқиқатчи сүпитидә кәлгән.

FBI Бу һәқтә турғузған җинайи шикайәттә униң та һазирғичә хитай азадлиқ армийәсидин мааш елип кәлгәнликни билдүрүлгән.

У, 2018-йили америка визисини илтимас қилиш җәдвилигә өзиниң хитай азадлиқ армийәси билән болған мунасивитини қәстән йошурған вә җәдвәлгә 2002-йилидин 2016-йилиғичә азадлиқ армийәсиниң сәһийә саһәсидә дотсент болуп ишлигәнликини язған икән.

У америкидин қайтишида йенидин тепилған бәзи тәтқиқат учурлири америка сәһийә министирлиқи мәбләғ салған тәтқиқат түрлиригә аит материяллар икән.

Ваң лос анҗилис хәлқара айродромидин тйәнҗингә қарап йолға чиқиш алдида қолға елинған. У америка чегра қоғдаш хадимлириға өзиниң хитай һәрбий университети тәҗрибиханисиниң директорниң йолйоруқиға асасән шундақ қилғанлиқини, америкидики тәҗрибиханиниң лайиһәсигә аит учурларни хитай елип келишкә буйрулғанлиқини иқрар қилған.

Мәлум болушичә, америка чегра қоғдаш даирилири ваңниң илгири тәҗрибихана учурлири вә тәтқиқат материяллирини хитайдики хизмәтдашлириға елхәт арқилиқ йоллиғанлиқи вә бир қисим материялларни елип хитайға қайтишқа тәмшиливатқанлиқиға аит йип учи тапшуруп алған икән.

Һалбуки, FBI ниң ваң үстидин сунған шикайәтнамидә униң пәқәт виза алдамчилиқи җинайити артилған болсиму, униң санаәт җасуслуқи билән шуғулланғанлиқи тилға елинмиған.

Хитайниң америкиға қаритилған сода мәхпийәтлики җасуслуқи йиллардин бери барғанчә рошән ашкарилинишқа башлиған.

Бу йил 29-май америкида президенти доналд трамп америкиға келидиған хитай оқуғучилар вә зиярәтчи алимларниң америка бихәтәрликигә зиян салидиғанлиқи гуман қилинса уларниң бирдәк чәклинидиғанлиқини елан қилған иди.