"америка 2022-йиллиқ бейҗиң қишлиқ олимпик мусабиқисини байқут қилиши керәк"

Мухбиримиз ирадә
2019-12-02
Share

Хитай һөкүмитиниң уйғур елидә йолға қойған йиғивелиш лагерлириға қарши туруш үчүн хитайниң 2022-йиллиқ қишлиқ олимпик мусабиқисини байқут қилиш чақириқлири күчийиватқан бир мәзгилдә, "лос-анҗелис вақти гезити" дә мушу һәқтә бир парчә көз қараш мақалиси елан қилинди.

"америка 2022-йиллиқ бейҗиң қишлиқ олимпик мусабиқисини байқут қилиши керәк" мавзулуқ бу мақалини "америка кәсипләр институти" вә "йәршари тәйвән институти" қатарлиқ тәтқиқат орунлириниң тәтқиқатчиси майкил мазза язған.

У мақалисидә, хитай һөкүмити уйғур районида милйонларчә уйғур вә башқа мусулман милләтләрни йиғивелиш лагерлириға қамап, уларниң миллий кимликини йоқитиватқанлиқи һәққидә ениқ пакитлар ашкариланғанлиқини, лагерларда аялларни туғмас қилиш вә балиларни ата-анилиридин айриветишкә охшаш ирқий қирғинчилиқниң амиллири болған бу һәрикәтләрниң кишиләрдә ши җинпиңниң ирқий қирғинчилиқ қилиш нийити барму, дегән соал пәйда қиливатқанлиқини баян қилған.

У, америка ташқи ишлар министирлиқи бу сиясәтләргә четишлиқ хитай әмәлдарлириға виза чәклимиси қойған вә бир қисим хитай муәссәсилиригә җаза тәдбири елан қилинған болсиму, буниң йетәрлик әмәсликини әскәрткән. У төвәндикиләрни баян қилған:

"йәниму көп тәдбирләр елиниши керәк. Әгәр америка вә башқа дөләтләр хитайни ғәлибилик һалда шинҗаңдики сиясәтлирини юмшитишқа көндүримән, дәйдикән у һалда улар ши җинпиңни биваситә нишанға елиши керәк. Тәләйгә, хәлқара җамаәтниң униңға қарши қоллинидиған үнүмлүк козири бар, у болсиму бейҗиңниң 2022-йиллиқ қишлиқ олимпик мусабиқисигә саһибханилиқ қилишидур"

У мақалисидә, хәлқара олимпик комитети әслидә хитай һөкүмитиниң уйғур районида йүргүзүватқан сиясәтлиригә даир тағдәк испатларға асасән, хитайниң бу мусабиқини өткүзүш һәққигә қайта қарап чиқиши керәклики, әмма улар буниңға көңүл бөлмәйватқан шараит астида америка қатарлиқ дөләтләрниң һәрикәткә өтүши лазимлиқини билдүргән. У мундақ дегән:

"америка трамп һөкүмити дөләт мәҗлиси билән бирликтә хәлқаралиқ һәмкарлиқ тәшкилләш арқилиқ хитай әгәр лагерларни тақимайдикән, у һалда олимпикни бикар қилиш яки уни башқа дөләткә йөткәш һәққидә хәлқаралиқ олимпик комитетиға бесим қилиш керәк. Әгәр олимпик комитети буни қобул қилмай турувалса, у һалда юқиридики бу һәмкарлашқан дөләтләр 2022-йиллиқ қишлиқ олимпикни байқут қилишқа тәйярлиниши вә "әркинлик мусабиқиси" намида йәнә бир мусабиқә уюштуруши керәк. Әгәр трамп һөкүмити һәрикәт қилмиса, у һалда дөләт мәҗлиси америка олимпик комитетини мусабиқини байқут қилишқа чақириши керәк. . ."

Аптор майкил мазза хитай һөкүмити рәһбәрлири олимпик мусабиқилирини өзиниң тәшвиқат васитиси қилип қоллинип кәлгәнликини нәзәрдә тутқанда, 2022-йиллиқ бейҗиң қишлиқ олимпик мусабиқисини бикар қилиш, йөткәш яки байқут қилишқа охшаш һәрикәтләрниң дөләт рәиси ши җинпиң үчүн ички сиясәтлири җәһәттә наһайити чоң номус һесаблинидиған болғачқа, униң уйғурларға қаратқан сиясәтлирини өзгәртишкә мәҗбурлаш үчүн үнүмлүк козир болидиғанлиқини тәкитлигән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт