«Хитай дигитал вақти» гезити: «дотсент абләт абдурешит бәрқи тутқун қилинған»

Мухбиримиз әркин
2019-02-20
Елхәт
Пикир
Share
Принт

Америкидики «хитай дигитал вақти» гезитидә тонулған уйғур әдәбият тәтқиқатчиси вә шаири абләт абдурешит бәрқи һәққидә узун бир мақалә елан қилинип, униң 2017‏-йили тутқун қилинғанлиқи илгири сүрүлди.

Мәзкур мақалә униң исраилийәдә оқуғуватқан вақтидики дости, хитай өктичи шаири вә язғучиси таң дәнхоң тәрипидин йезилған.

Таң дәнхоң мақалисидә абләт абдурешит бәрқи билән тонушуш җәряни, униң билән болған сөһбити, униң өзидә қалдурған тәсири, иҗадийити, униң билән һәр хил иҗтимаий темиларда елип барған пикир алмаштуруши қатарлиқ мәсилиләр һәққидә тәпсилий тохталған. Шуниңдәк йәнә абләт абдурешит бәрқиниң исраилийә һайфа университетидики оқутқучиси профессор нимрод барановични зиярәт қилған.

Профессор баранович өзиниң абләт абдурешит бәрқи билән болған достлуқи, униң илмий паалийити вә өзидә қалдурған тәсирати қатарлиқлар һәққидә өзиниң қарашлирини билдүргән. У абләт абдурешит бәрқиниң өзидә чоңқур тәсир қалдурғанлиқини билдүрүп, «униң анализ қилиш вә тәнқид қилиш иқтидари мениңдә бәкму чоңқур тәсир қалдурған иди» дегән.

Абләт абдурешит бәрқи 2014‏-йилдин 2016‏-йилғичә һайфа университетиниң асия тәтқиқат мәркизидә докторашти тәтқиқати билән шуғуллинип, 2016‏-йили 9‏-айда үрүмчигә қайтип кәткән икән. Таң дәнхоң униң 2017‏-йили тутқун қилинғанлиқи, лекин тутқун қилинған конкрет вақтиниң ениқ әмәслики, униң лагерда икәнликини илгири сүргән.

Чәтәлләрдики иҗтимаий таратқуларда өткән йили абләт абдурешит бәрқиниң из-дерәксиз ғайиб болғанлиқи, униң тутқун қилинған болуши мумкинлики һәққидә хәвәрләр тарқалған. Әмма бу хәвәрләр һазирға қәдәр дәлилләнмигән иди.

Таң дәнхоң абләт абдурешит бәрқи билән ахирқи қетим у үрүмчигә қайтиштин бирқанчә күн бурун фейсбукниң алақә суписи болған «мәсенҗер» дә алақиләшкән, шуниңдин кейин униң билән биваситә алақә қилип бақмиған икән.

У абләт абдурешит бәрқиниң тутқун қилинғанлиқини, униң тутқун қилинип лагерда қамалғанлиқини чәтәлдики уйғур учур мәнбәлиридин алғанлиқини билдүргән.

Пикирләр (0)
Share
Толуқ бәт