Xitay hökümiti “Shinjang musulmanliri tori” tesis qilip, kompartiyening dini siyasitini teshwiq qilishqa bashlighan

Igilishimizche, xitay hökümiti yéqinda ürümchide tesis qilin'ghan Uyghur we xitay tilliridiki “Shinjang musulmanliri tori” din paydillinip, xitay ichi we xelq'aragha özining din siyasitini teshwiq qilishqa bashlighan.

Mezkur tor bettin melum bolushiche, da'iriler Uyghur aptonom rayonluq islam dini jem'iyitide re'is yaki mu'awin re'islik wezipisini ötewatqan yaki herqaysiy chong jamelerning imamliqigha teyinlen'gen “Qizil kinishkiliq diniy zat” larni ishqa sélip mexsus wez - tebligh filimi ishligen.

Ulardin shinjang islam institutining mudiri abdureqip damolla sözligen “Peyghember eleyhissalamning weten söygüsidin ögineyli”, ürümchi aq meschitning imami abdushükür rehmitulla damolla hajim sözligen “Islam dini otturihal yol tutushni teshebbus qilidu”, ürümchi noghay meschitning imami muhemmetrehim shérip damolla hajimn sözligen “Islam dinidiki 5 perzning biri - roza tutush” qatarliq wez - tebligh filimliri tor betke qoyulghan.

Abdureqip damolla mezkur tebligh filimide peyghember eleyhissalamning mekke we medine heqqide éytqan hedisliridin neqil keltürüp, Uyghur musulman jama'itini öz yurtini söyüshke shundaqla öz yurti tewe bolghan “Weten” ni himaye qilishqa chaqirghan.

Közetküchiler we muhajirette yashwatqan Uyghur diniy zatlar xitay hökümiti bazargha salghan mezkur tor betning islam dini üchün emes, belki xitay hökümitining siyasetliri üchün teshwiqat qurali boliwatqanliqini ilgiri sürmekte.