Xitayda özini öltürüwalghan emeldarlarning zor köpchiliki parixor, xiyanetchiler

Xitay xewerliridin melum bolushiche, 2014-yili xitayda özini öltürüwalghan hökümet emeldarlirining nisbiti aldinqi yillardikidin köpeygen bolup, bularning zor köpchiliki parixorluq, xiyanetchilik qilmishi tekshürülgenler iken.

Xitayning junggo xewerler torining 29-yanwar peyshenbe künidiki xewiride déyilishiche, 2014-yili 1-aydin 9-aygha qeder 32 neper hökümet emeldari özini öltürüwalghan. Bularning 30% pirsenti intizamgha éghir derijide xilapliq qilish bilen eyiblinip, parixorluq, xiyanetchilik qilmishliri resmiy tekshürüsh basquchida özini öltürüwalghan.

2014-Yili xitayda hökümet emeldarlirining chiriklik qilmishigha “Qattiq zerbe bérish” herikiti kücheygen. Ju yongkang, shü seyxu, ling jixu'a qatarliq dölet derijilik we ölke derijilik emeldarlardinla 50 tin artuq kishi parixorluq, xiyanetchilik qatarliq chiriklik déloliri bilen eyiblinip, xizmitidin élip tashlan'ghan we sot orunlirining bir terep qilishigha tapshurulghan idi.