Хитай һөкүмәт тори бир хитай әскәрниң уйғур елида бир қетимдила 6 адәмни етип өлтүргәнликини ашкарилиған

Мухбиримиз ирадә
2021-08-05
Share

Хитайниң тәңритағ тори 5-авғуст күни тарқатқан бир хәвиридә уйғур елидики аталмиш "террорлуққа қарши туруш" урушида бир хитай әскәрниң бир қетимдила 6 адәмни өлтүргәнликини тәнтәнә қилған.

Хәвәрдә баян қилинишичә, 2011-йили армийәгә қатнашқан ву җяв исимлик бир әскәр шинҗаң қораллиқ сақчи қисими алаһидә һәрикәт әтритиниң муавин әтрәт башлиқилиқ вәзиписини өтигән мәзгилидә йүз бәргән "зораван терорлуқ вәқәси" дә бир қетимда алтә кишини өлтүргәникән.

Диққәт қозғайдиғини, хитай һөкүмәт тори хәвиридә йәнә, вуҗиявниң қолида қорали болмиған 6 кишини бивастә қаршилишиш болмай туруп соал-сорақсиз нәқ мәйданда етивәткәнликини өз ағзи билән етирап қилған вә уни "қәһриманлиқ" дәп тәсвирлигән.

Хәвәрдин қариғанда, у вәқә 2014-йили язда йүз бәргән болуп, әйни чағда алаһидә һәрикәт биринчи әтритигә қечип кәткән зораван терорчиларни қоғлаш, қоршаш, қолға елиш вә йоқитиш буйруқи берилгән. Буниң билән вуҗияв пахта етизлиқлиридин қечип кетиватқан 2 қоралсз кишини нәқ мәйданда милтиқ билән етип өлтүргән вә арқидинла йәнә 4 кишини етип өлтүргәникән.

Тәңритағ тори хәвиридә, ву җявниң "мән пәқәт әң яхши җәң һалитини сақлап, вәзипини орундап дүшмәнни йоқитишни халаймән" дегәнликини илгири сүрүп уни "қәһриман әскәр" дәп мәдһийлигән.

Һалбуки, чәтәлләрдики уйғур көзәткүчиләр хитайниң һөкүмәт таратқусида тарқитилған бу хәвәрни хитайниң уйғур елидики аталмиш "терролуққа қарши туруш" намида йүргүзүватқан "сотсиз өлүм", йәни хитай әскәр-сақчилириниң уйғурларға халиғанчә оқ чиқирип қирип ташлаш қилмишлириниң полаттәк пакити, дәп қаримақта.

Улар юқиридики хәвәрдики вуҗияв исимлик бу әскәрниң қилмишлириниң кейинки күнләрдә хитай һөкүмитиниң уйғур елида йүргүзүватқан ирқий қирғинчилиқ вә инсанийәткә қарши җинайәтлири үчүн полаттәк пакит болуп қалидиғанлиқини дейишмәктә.

Техи йеқинда хитайниң "шинҗаң гезити" хәвиридә қәшқәрдики "террорлуққа қарши туруш хәнҗири" дәп нам берилгән бир алаһидә уруш қилиш оттура әтритиниң бир қетимлиқ аталмиш "терорлуқ вәқәси" дә 17 нәпәр аталмиш "зораван террорчи" ни бир қетимдила етип өлтүргәнликини, 121 кишини тутқун қилғанлиқини билдүргәниди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт