Хитай - иран аяллар муһакимә йиғини үрүмчидә өткүзүлгән

Мухбиримиз қутлан
2016-09-24
Share


Игилинишичә, 3 - нөвәтлик хитай - иран аяллар муһакимә йиғини 22 - сентәбир күни үрүмчидә өткүзүлгән.

"шинҗаң гезити" ниң бу һәқтики хәвиригә қариғанда, мәзкур муһакимә йиғини хитай билән иран аяллириниң өз - ара һәмкарлиқи вә достанә алақисини күчәйтиш һәмдә икки дөләт аяллириниң җәмийәттики орнини йоқири көтүрүшни мәқсәт қилип чақирилған икән.

Хәвәрдә дейилишичә, муһакимә йиғинида уйғур аптоном районлуқ аяллар бирләшмиси партигурупписиниң секритари ху хәнмин хитай аяллири, җүмлидин уйғур районидики аялларниң омумий әһвалини тонуштурған. Иран ислам җумһурийити аяллар вә аилә ишлири министири һиҗази иран аяллириниң әһвали һәққидә доклат бәргән. Мәзкур муһакимә йиғинида йәнә аяллар вә иқтисад, аяллар вә маарип, аяллар һоқуқи қатарлиқ темиларда муһакимә елип берилғанлиқи мәлум.

Игилинишичә, хитай билән иран оттурисида йеқинқи йиллардин буян түрлүк саһәләр бойичә алақиләр күчәйгән болуп, уйғур аптоном райони икки дөләт арисидики алақиләрдә көврүк қилинмақтикән.

Бу йил яз иран пайтәхти теһранда "шинҗаң мәдәнийәт һәптилики" өткүзүлгән болуп, шинҗаң нахша - уссул өмики иранда бирқанчә мәйда оюн көрсәткән. Мустәқил таратқуларниң хәвиригә қариғанда, хитай һөкүмитиниң уйғур аптоном районидики шиә мәзһипигә мәнсуп талипларни иранға әвәтип тәрбийәләватқанлиқи илгири сүрүлмәктә.

Көзәткүчиләр, бу қетимлиқ хитай - иран аяллар муһакимә йиғининиң үрүмчидә өткүзүлиши икки дөләт арисидики уйғур елини көврүк қилған бир қатар сирлиқ мунасивәтләрниң бир көринишидур, дәп һесаблимақта.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт