«Бир америка» хәвәр ториниң даңлиқ риясәтчиси лиз велир 14-июл «хитай компартийәсиниң сизниң белип қилишиңизни халимайдиған ишлири» намлиқ бир программа ишлигән. Бу программа фейисбук, тивиттер қатарлиқ иҗтимаий таратқуларда наһайити күчлүк инкас пәйда қилған.
Лиз велир программисида әмәлий мисаллар арқилиқ хитайниң әпти-бәширисини ечип көрсәткән. «Тйәнәнмен вәқәси» дин тартип, хоңкоң димократийәсиниң вәйран қилинишиғичә, бир милйондин үч милйонғичә уйғурларланиң йиғивелиш лагерлирида қийин қистаққа учришидин тартип корона веруси һәққидә һәқиқий учурларни ашкарилиғанларниң из-дирәксиз ғайиб қилинишиғичә болған көплигән мәсилиләрни бир-бирләп оттуриға қойған.
У йәнә программисида «марко рубию, тед кируз қатарлиқ җигәрлик парлармент әзалири хитайда йүз бериватқан еғир кишилик һоқуқ дәпсәндичилики һәққидә һәқиқәтни сөзлигәнлики үчүн хитай һөкүмити уларға қарши чәкләш сиясәтлирини йолға қойди. Башқа парламинит әзалири вә башқа дөләтләрму сүкүттә турмаңлар, хитайниң бизниң белип қилишимизни халимайдиғини дәл уларниң һәқиқий рәзил ички йүзидур,» деди.
9-Июл күни америка һөкүмити уйғурларни бастурушта биваситә қоли болған чен чүәнго қатарлиқ 4 нәпәр хитай әмәлдариға җаза елан қилғандин кейин, хитай һөкүмити 13-июл күни америкадин өч елиш үчүн марко рубийо қатарлиқ 4 нәпәр америка әмәлдариға «җаза тәдбири» елан қилған иди.
