Хитай қорғаста һакимийәт органлирини ишқа кириштүрмәктә

Мухбиримиз үмидвар
2015-04-19
Елхәт
Пикир
Share
Принт


Техи өткән һәптә хитай турпан вилайитини әмәлдин қалдуруп, уни вилайәт дәриҗилик шәһәргә айландурғандин кейин, йәнә мәтбуатларда ишләпчиқириш қурулуш армийәси тәвәсидики бир қанчә йеңи шәһәрләрниң вивиска есишқа башлиғанлиқи хәвәр қилинған иди.

Уйғур дияри билән қазақистан чеграсиға җайлашқан қорғас өткән йили 9 - айда рәсмий шәһәр болуп қурулғандин кейин, 18 - април күни қорғас шәһәрлик хәлқ қурултийи даимий комитети вә қорғас шәһәрлик сиясий кеңәш рәсмий вивиска есип ишқа киришти.

«Шинҗаң гезити»ниң хәвәр қилишичә, йеңидин қурулған қорғас шәһәрлик хәлқ қурултийиниң биринчи нөвәтлик қурултийиниң 37 нәпәр әзаси бар болуп, бу әзалар 14 - 16 - април күнлири ечилған қорғас шәһәрлик хәлқ қурултийида бекитилгән.

Хәвәрдин,мәлум болушичә, қорғас шәһириниң партком секиртарлиқиға ваң гаң исимлик бири тәйинләнгән.

Қорғас шәһәрлик хәлқ қурултийи вә сиясий кеңәшниң вивиска есиш мурасимиға уйғур аптоном райони партком вә хәлқ қурултийидин нәйим ясин вә әсқәр турсун исимлик икки шәхс қатнашқан.

Йеңидин қурулған қорғас шәһириниң нопуси 40 миңдин артуқ болуп, қорғас хитай мәркизий һөкүмити тәрипидин муһим чегра еғизи вә иқтисадий алаһидә район дәп бекитилип зор мәбләғ аҗритилған.

Мулаһизичиләрниң ейтишичә, мәзкур қорғас районида әслидә уйғурлар, қазақлар мутләқ көп санлиқни игилигән болуп, өткән әсирниң 60 - йиллиридики совет иттипақиға аммиви қечиштин кейин хитай көчмәнлири көпләп орунлишишқа башлиған. Һазир қорғас шәһиридә хитай көчмәнлириниң сани мутләқ көп санлиқни игилигән вә кәлгүсидә техиму көпийиш мумкин икән.

Пикирләр (0)
Share
Толуқ бәт