Хитай компартийисиниң 19-қурултийиға уйғур районидин тәйинләнгән 43 вәкилдин 9 и уйғур

Мухбиримиз шөһрәт һошур
2017-07-05
Share

Уйғур районлуқ партком 6-айниң 29-күни аталмиш сайлам өткүзүп, бейҗиңда ечилидиған хитай компартийисиниң 19-қурултийиға қатнишидиған 43 вәкилни бекитип чиққан.

"шинҗаң гезити"ниң бүгүнки бу һәқтики хәвиридин мәлум болушичә, мәзкур 43 вәкилниң 25 нәпири хитай, 9 нәпири уйғур, қалған 9 нәпири қазақ, қирғиз, таҗик, туңган, шевә, моңғул қатарлиқ 6 милләт тәшкилләнгән.

Хәвәрләрдә дейилишичә, 19-қурултайда ши җинпиң рәһбәрлик орнини йәниму мустәһкәмләш, бир бәлвағ, бир йол пиланини изчиллаштуруш қатарлиқ хитай һакимийити астидики барлиқ милләтләрниң мәнпәәтлиригә четишлиқ қарарлар елиниду. Мана мушундақ бир зор йиғинда, райондики нопусниң йеримиға йеқинини игиләйдиған уйғур миллитидин пәқәт 9 нәпәр, нопусниң 40% игә йәтмәйдиған хитай миллитидин 25 нәпәр вәкил тәйинлиниши, муһаҗирәттики уйғур көзәткүчилириниң диққитини тартти.

Америкада яшаватқан сиясий көзәткүчи учқунҗан әпәндиниң қаришичә, бу бир йеңи әһвал әмәс, әмма буниңдики санлиқ мәлуматлар, хитай техи йеқинда елан қилған ақ ташлиқ китабидики уйғур районида милләтләрниң сиясий һәқләрдин ортақ бәһримән болуватқанлиқи һәққидики баянларни түптин рәт қилидиған пакитлардур.

Аталмиш 9 вәкилниң сан җәһәттин аз болуштин башқа йәнә, уйғурлар тәрипидин сайланған әмәс, компартийә тәрипидин тәйинләнгәнликини әскәрткән учқунҗан әпәнди, уйғур райониниң һакимийәт қатлимида хитайдин башқа милләтләрниң орни пүтүнләйла йоқ икәнликини илгири сүрди.

Хәвәрдин мәлум болушичә 9 нәпәр вәкил қатариға хитайға садақәт билдүрүп нам чиқарған керийәлик йеза башлиқи обулқасим мәттурсунму киргүзүлгән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт