Америка мәркизий истихбарат идариси хитай билән риқабәтлишәләйдиған йеңи тор қорали ясап чиқти

Вашингтондин мухбиримиз әзиз тәйярлиди
2023.09.27

“блумберг хәвәрлири” ниң 26-сентәбирдики хәвиридә ейтилишичә, америка мәркизий истихбарат идариси (CIA) йеқинда характер җәһәттә ChatGPT ға охшап кетидиған сүний әқил системисини ишләп чиққан болуп, америка һөкүмитигә қарашлиқ 18 истихбарат оргининиң һәммисидә ишлитилишкә тапшурулған.

Мәзкур сүний әқил системиси тағдәк дөвилинип кетидиған очуқ учур мәнбәлиридин истихбарат органлири тәкшүрүватқан делолар вә мәсилиләргә четишлиқ учурларни әң тез сүрәттә топлап сүзүп чиқалайдикән. Хәвәрдә ейтилишичә, буниң тез сүрәттә ясап чиқилишиға хитайниң дуня миқясида технологийә саһәсигә һөкүмранлиқ қиливелишқа урунуватқанлиқи сәвәб болған. Мәркизий истихбарат идариси сүний әқил бөлүминиң директори рандий никсон (Randy Nixon) бу һәқтә сөз қилип “биз гезит вә радийодин гезит вә телевизорға, андин қайтидин гезит вә торға чиқимиз. Бу җәрянда топлиған учурларни анализ қилип чиқиш биз үчүн деңиздин йиңнә издәшкә охшап қалған иди. Бу қорал бизниң бу җәһәттики йүкимизни зор дәриҗидә йениклитиду” дегән.

Хәвәрдә ейтилишичә, хитай һазир әң зор күч сәрп қиливатқан нуқта сүний әқил саһәси болуп, 2030-йилиға барғанда бу саһәдә дунявий йетәкчигә айлиниш нишанини ашкара оттуриға қоюп болған. Хитай һөкүмити 2021-йили ясап чиққан “тәптиш” намлиқ сүний әқил системиси өзигә тапшурулған җинайи дәстурларни тәһқиқләш вә уларға һөкүм елан қилишта 97 пирсәнтлик тоғрилиққа йәткән. Әмма америка қанун саһәси һазирму буниңда йәнила адәм күчи арқилиқ иш беҗиришни давам қилип кәлгән. Мәзкур йеңи тор қорали америка истихбарат хадимлирини әң тез сүрәттә лазимлиқ учурларни әң тоғра тепип чиқиш, шундақла пайдилиқ учурларни вә йошурун хәвпләрни байқаш имканийитигә игә қилидикән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.