Америка һөкүмити: хитай ғәрб дөләтлири яки русийәдин бирни таллиши керәк

Вашингтондин мухбиримиз җәвлан тәйярлиди
2024.05.17

Америка һөкүмити бу һәптә пәйшәнбә күни (16-май)  бейҗиңға зиярәткә кәлгән русийә пирезиденти виладимир путинни давамлиқ қоллайдиғанлиқини билдүргән хитай һөкүмитини әйиблигән.

“һәптилик хәвәрләр” ториниң 16-май күни бу һәқтә бәргән хәвиридә ейтилишичә, америка ташқи ишлар министири билинкен хитайниң нөвәттә ғәрб дөләтлириниң йенида яки русийәниң йенида туруши керәкликини тәкитләп: “әгәр хитай явропа вә башқа дөләтләр билән яхши мунасивитини сақлап қалимән дәйдикән, явропаниң хәвпсизликигә әң чоң тәһдит селиватқан русийәгә ярдәм бәрмәслики керәк; бу американиңла мәйдани болуп қалмастин, явропа иттипақи, нато вә ‛7 дөләт гуруһи‚ ниң ортақ мәйданидур” дегән. 

Путинниң бу қетим хитайни зиярәт қилиши, у 5-қетимлиқ вәзипигә олтурғандин буян елип барған тунҗи дөләт зиярити болуп, украинаға қилған һуҗуми 3-йилиға қәдәм қойған, америка билән явропа русийәгә давамлиқ ембарго йүргүзүватқан бир мәзгилгә тоғра кәлгән.

 Америка баянатчисиниң билдүрүшичә, әгәр хитай русийәгә ярдәм бәрмисә, русийә бу урушта ғайәт зор қийинчилиқларға йолуқидикән. У мундақ дегән: “һечқандақ дөләт путинниң украинаға қилған таҗавузчилиқ һуҗумиға ярдәм бәрмәслики керәк. Биз русийәниң украинаға елип барған хәлқара қанунға хилап һәрикәтлиригә көз юмалмаймиз һәмдә бу урушқа җавабкар болғанлардин һесаб сораймиз”.

Хәвәрдә көрситилишичә, путинниң бу қетим хитайни зиярәт қилиши икки тәрәп мунасивитиниң давамлиқ чоңқурлишидиғанлиқидин дерәк беридикән. Йәни һазир хитай-русийә рәзиллик иттипақи аллиқачан шәкилләнгән болуп, америка билән явропа  бу иттипақниң “истратегийәлик һәмкарлиқи” ни тонуп йетип, һәр иккисигә охшаш җаза қоллиниши керәк икән. Болмиса, улар кәлгүсидә техиму хәтәрлик күчкә айлинидикән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.