Америка федератсийә хәвәрлишиш комитети (FCC) хитай игидарчилиқидики йәнә икки телеграф-хәвәрлишиш ширкитини чәклигән

Мухбиримиз ирадә
2022-03-17
Share

Америка федератсийә хәвәрлишиш комитети (FCC) хитай игидарчилиқидики йәнә икки телеграф-хәвәрлишиш ширкитиниң америка базирида тиҗарәт қилишини чәклигән.

Ройтерс агентлиқиниң хәвәр қилишичә, 16-март чаршәнбә күни бу орган хитайниң “тинч окян тори” вә униң игидарчилиқидики тармақ ширкити болған “ComNet” ниң америкада кишиләрни дөләт ичи вә хәлқара мулазимәт билән тәминлишини чәклигән.

Бу һәрикәт америка федератсийә хәвәрлишиш комитетиниң хитайниң америка алақә торидики йошурун җасуслуқидин сақлиниш үчүн қолланған бир йүрүш һәрикәтлириниң әң йеңиси болуп һесаблинидикән. Илгири у хитайниң лйәнтоң дәп атилидиған “бирләшмә хәвәрлишиш ширкити” вә шундақла “хитай телиграфи америка” шеркитини чәклигән иди. Бундин башқа америка йәнә хуавей вә җоңшиң телеграф ширкәтлириниң үскүнилириниму чәклигән.

Америка федератсийә хәвәрлишиш комитетиниң рәиси җессика росенворсел бу һәрикәтләрниң америкада тор вә учур-алақә бихәтәрликигә капаләтлик қилишни мәқсәт қилғанлиқини билдүргән.

Һалбуки, хитай ташқий ишлар министирлиқиниң баянатчиси җав лиҗйән буни әйибләп: “америка хитай ширкәтлириниң һоқуқини дәпсәндә қилди, бу хәлқара сода қаидилиригә хилап,” дәп җар салған.

Хитайниң хәвәрлишиш ширкәтлири вә уларниң үскүнилириниң америка дөләт бихәтәрликигә тәһдит икәнлики 2018-йили бир қисим америка дөләт мәҗлис әзалири тәрипидин оттуриға қоюлған иди. Бу америка дөләт органлирини хитайниң хуавей ширкити вә җоңшин ширкити ишләпчиқарған телефон вә башқа үскүниләрни ишлитиштин чәкләш һәққидики бир қанун лайиһәси елан қилғандин кейин, хуавей қатарлиқ хитай ширкәтлириниң дөләт бихәтәрликигә пәйда қилидиған хәвпи һәққидики муназириләрму күчәйгән вә нәтиҗидә бу ширкәтләр чәкләнгән иди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт