Америка рәһбәрлириниң хитай һәққидә ейтқанлири тордин өчүриветилгән

Американиң хитайда турушлуқ баш әлчиси никулас бурнис (Nicholas Burns) 6-июл күни твиттер йоллап, хитай һөкүмитиниң пикир әркинликини чәкләш қилмиши үстидин шикайәт қилған.

У твиттерға йоллиған учурида мундақ дегән: “җуңхуа хәлқ җумһурийәти назарәт орунлири мениң үндидар )вичат) ға йоллиған учурумни, йәни ақсарай билән америка ташқий ишлар министирликиниң хоңкоң вә нато башлиқлар йиғини һәққидә йоллиған язмамни өчүриветипту. Җуңхуа хәлқ җумһурийәти өз пуқралириниң америка рәһбәрлириниң немә дегәнликини билишкә йол қоюши керәк, америка хәлқиму җуңго рәһбәрлириниң қилған сөзлирини аңлиялайду”.

Никулас бурнис буниңға пакит сүпитидә қистурған рәсимләргә қариғанда, хитай тор назарәт тармақлири ақсарайниң вә америка ташқий ишлар минситири антони билинкинниң хитайниң хоңкоңни қайтурувалғанлиқиниң 25 йиллиқи мунасивити билән сөзлигән сөзини өчүрүвәткән; униңдин башқа, американиң хитайда турушлуқ әлчиханиси хитайниң иҗтимаий алақә суписи болған вейбода елан қилған “2022-йиллиқ нато дөләт башлиқлири йиғини учришиши” һәққидә бәргән баянатлирини тәкшүрүштин өткүзгән.

Мунасивәтлик хәвәрләрдин мәлум болғинидәк, хитай тик-ток қатарлиқ әпләрдин шәхсий учур оғрилиған билән, өз пуқралириниңму учурлири оғриланған. Буниңдин сарасимигә чүшкән хитай чәт әлдин, болупму америкадин келидиған һәр қандақ шәпигә алаһидә сәзгүр болуп кәткән; өзиниң тәшвиқатлирини америкадәк дөләтләргә кәң тарқитип келиватқан болсиму, хитай һәққидә берилгән баһа вә тәнқидләрни өз пуқралириниң билип қелишиға йол қоймай кәлгән.