Хитай тәшвиқатчилири “шаңхәйлик гули” намлиқ кино ишләп тарқатқан
2025.01.15
“хитай хәвәрлири тори” ниң 15-январ чиқарған хәвиригә қариғанда, хитай режиссори ваң луша ишлигән “шаңхәйлик гули” намлиқ филим 14-январ күни хитай мәркизий телевизийә истансиси кино қанили тәрипидин тунҗи қетим қоюлған. Хәвәрдә йәнә, бу филимниң “шинҗаң уйғур аптоном райони қурулғанлиқиниң 70 йиллиқи, йеңи дәвр шинҗаң хизмитиниң 15 йиллиқи, қәшқәр иқтисадий алаһидә райони қурулғанлиқини 15 йиллиқиға қилинған совғат икәнлики алаһидә әскәртилгән.
Бу 2019-йили хитай режиссори фаң җүнляң ишләп тарқатқан “қәшқәрлик гули” намлиқ филимдин кейин оттуриға чиққан йәнә бир тәшвиқат филими болуп, һәр икки филим хитай һөкүмитиниң “шинҗаң һекайисини сөзләш” чақириқиға маслашқан. Охшимайдиған йери, “қәшқәрлик гули” филимдә, шенҗенлиқ оқутқучи ляң пең билән бу шәһәргә қәшқәрдин кәлгән “шинҗаң толуқ оттура мәктипи” мәсули йүән шөниң муһәббәт һекайиси баян қилинған болса; “шаңхәйлик гули” филимида йәркән наһийәсидин кәлгән навай шаһи вариси адилҗанниң ата мирас кәспигә варислиқ қилиштин ваз кечип, музикант болуш ғайисидә шаңхәйдә сәрсан болуп йүргәнлики вә бу шәһәрдә өз вақтида “шинҗаңға ярдәм бериш” кә барған хитай кадирниң әвлади болған шен чйәнчйән билән тонушуп муһәббәтләшкәнлики баян қилинған. Алдинқи филимда икки маканда яшаватқан хитай яшлириниң һекайиси сөзләнгән болса; кейинки филимда уйғур йигит билән хитай қизниң муһәббәт һекайиси сөзләнгән. Буниңдин хитай тәшвиқатчилириниң һәр қайси милләтләрни макан вә милләт чәклимисидин һалқип, бир хитай аилисидә бирлишишкә тәшәббус қиливатқанлиқи намаян болмақта.
Хәвәрдә дейилишичә, хитай мәркизий телевизийә истансиси кино қанили бөлүминиң мудири лин линиң “шаңхәйлик гули” намлиқ филимда кино арқилиқ “шинҗаң һекайиси” ниң сөзләнгәнликини, “қәшқәрлик гули” филимидин кейин йәнә бир қетим “шинҗаң таамлири, шинҗаң мәнзириси, шинҗаң гүзәллири” ниң намаян болғанлиқини билдүргән.
“қәшқәрлик гули” филиминиң көп қисим көрүнүшлиридә қәшқәрниң өзгичә алаһидилики әкс әткән болуп, қәшқәр саяһәтчилики тәшвиқ қилинған; “шаңхәйлик гули” филимида, узун йил юртиға қайтмиған адилҗанниң 10 нәччә йилдин қайтқинида “шинҗаңда қалтис тәрәққият” болғанлиқидин һаяҗанланғанлиқи ипадиләнгән болуп, хитайниң йеқинқи йиллардики “шинҗаң тәшвиқати” ға маслашқанлиқи көрүлмәктә.