Tiwittér xitay elchixanisining tiwittér hésabini Uyghur ayalliri heqqidiki uchuri seweblik taqighan

Muxbirimiz irade
2021-01-21
Share

Tiwittér xitayning amérikada turushluq elchixanisining hésabini yéqinda ularning Uyghur ayalliri heqqide tarqatqan uchuri seweblik taqighanliqini jakarlidi. Tiwittér xitay elchixanisining uchurini özlirining "Insansizlashturush", yeni "Insanliqtin chiqirish" tek qilmishlarning aldini élishqa munasiwetlik prinsiplirigha xilap, dep körsetken.

Roytérs agéntliqining xewirige qarighanda, tiwittér bu heqtiki bayanatida mundaq dégen: "Silerning tiwittér uchuringlar bizning 'insansizlashturush' qa qarshi turush pirinsipimizgha xilap bolghanliqi üchün, biz bu heriketni qollanduq. Biz bir pütün topluq yaki ademlerning dini, irqi, milliti we yaki bashqa katégoriyege asasen 'insansizlashturush' qa yol qoymaymiz."

Xitayning amérikada turushluq elchixanisi 1-ayning 8-küni tiwittérdiki resmiy hésabi arqiliq tarqatqan uchurida "Uyghur ayallirini bala tughush mashinisi" gha oxshitish bilen birge, ulargha qaritiliwatqan mejburiy tughmas qilish, mejburiy bala chüshürüsh siyasetlirini aqlighan idi.

Mezkur uchur amérika hökümiti we bashqa nurghun kishilik hoquq organliri we pa'aliyetchilirining küchlük tenqidige uchrighandin kéyin, tiwittér xitay elchixanisining uchurini öchürüwetken. Biraq tiwittér bügünki bayanida mezkur uchurni xitay elchixanisi öziningmu öchürüshi kéreklikini, eger undaq qilmaydiken ularning tiwittér hésabini eslige keltürmeydighanliqini bildürgen.

Amérika tramp hökümiti axirqi künide xitayning Uyghurlargha yürgüzüwatqan zulumlirini "Irqiy qirghinchiliq" we "Insaniyetke qarshi jinayet" dep élan qilghandin kéyin, tiwittérning bundaq heriket qollinishi diqqet qozghidi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet