Xitaydiki uniwérsitétlar xitay kompartiyesining biwasite kontrolluqigha ötken

Xitay kompartiyesi xitaydiki aliy mekteplerge qarita bashqurush qurulmisini özgertip, aliy mekteplerni kompartiyening biwasite kontrolluqigha alghan.

Melum bolushiche, burun ayrim-ayrim bolghan mektep mudiri ‍ishxanisi bilen partiye komitéti ishxanisi birleshtürülüp, aliy mekteplerde “Birlikke kelgen rehberlik” teshkil qilinmaqtiken. Radiyomizning érishken bu heqtiki xewerliride, bu arqiliq xitaydiki aliy mekteplerni bashqurushta mudir ishxanisining emes, partiye komitétlirining biwasite rol oynaydighanliqi bildürülgen.

Xewerde körsitilishiche, analizchilar xitaydiki aliy mektep we ilmiy tetqiqat orunlirida partiye komitéti eslidinla mewjut bolsimu, mudiriyet bilen partiye komitétini birleshtürüshning xitayda ilgiri héchqachan bolup baqmighan hadise ikenlikini, hetta “Medeniyet inqilabi” dek siyasiy dawalghush yilliridimu bolup baqmighanliqini qeyt qilishmaqtiken.

Melum bolushiche, xitayning chingxu'a uniwérsitéti partkomi 14-yanwar küni uqturush chüshürüp, mektep mudiri ishxanisi bilen birleshken yéngi partiye komitéti ishxanisi teshkil qilin'ghanliqi we mektepni bu ishxana bashquridighanliqini élan qilghan.

Nöwette, xitay aliy mektepliridiki bu xil yéngi bashqurush sheklining Uyghur rayonida emeliyleshken yaki emeliyleshmigenliki éniq bolmisimu, lékin memuri bashqurushta partiye komitétliri ezeldin intayin küchlük bolghan Uyghur rayonida, bu xil bashqurush sheklining pat yéqinda derhal emeliylishishini perez qilish tes emes, dep qaralmaqta.

Xewerde bildürülüshiche, aliy mektep bashqurush qurulmisidiki bu özgirish chingxu'a uniwérsitéti bilen cheklenmeydiken. Bu xil yéngi bashqurush qurulmisining xitaydiki bashqa aliy mekteplerdimu yolgha qoyulghanliqi, jümlidin xitayning shangxey jyawtong uniwérsitéti, gherbiy-jenup jyawtong uniwérsitéti, sichüen uniwérsitéti, béyjing awi'atsiye uniwérsitéti, nenjing uniwérsitéti qatarliq aliy mektepliriningmu bu xil bashqurush sheklige ötkenliki qeyt qilinmaqta.