Марко рубио: ""хитай корона вирусиниң санлиқ учурини йошуруп, униң тарқилишиға йол қойди"

Мухбиримиз әркин
2020-03-23
Share

Америка дөләт мәҗлиси хитай ишлар комитетиниң қош рәиси, кеңәш палата әзаси марко рубио, 22-март күни хитайниң корона вируси мәсилисидики сияситини қаттиқ тәнқидләп, хитайниң вирусниң дуняға кәң көләмлик тарқилишиға йол ачқанлиқини әйиблиди.

Марко рубиониң тәкитлишичә, хитай, вирусниң дәсләпки басқучиға даир ачқучлуқ учурларни йошурған. Башқа дөләтләргә тәдбир алмаслиқ һәққидә бесим ишлитип, вирусниң дуняви юқумға айлинишини кәлтүрүп чиқарған.

Марко рубио бу сөзләрни хитай һөкүмити вухәндә партлиған бу вирусниң мәнбәсиниң хитайда икәнликини рәт қилип, мәсулийәттин қечишқа шундақла дуняда өзигә иҗабий образ тикләш үчүн тиришиватқан мәзгилдә қилди. Хитайниң вирус мәнбәсиниң хитайда икәнликини рәт қилип, вирусни америка армийәсиниң тарқатқанлиқини илгири сүрүши американиң қаттиқ дипломатик наразилиқини қозғиған.

Хитайниң америкада турушлуқ баш әлчиси суй тйәнкәй 22-март америкадики "аксиоз" ториниң зияритини қобул қилип, хитай дипломатлириниң бу сөзлиригә чүшәнчә беришкә мәҗбур болған. У вирусниң қәйәрдин тарқалғанлиқини "дипломатлар әмәс, тәтқиқатчилар қарар қилиши керәклики" ни илгири сүргән.

Марко рубио 22-март америка "фокс хәвәрлири" телевизийәсиниң зияритини қобул қилғанда мундақ дегән: "мән шуни ейталаймәнки, хитайниң вирусни ашкарилимайла қалмай, бир қисим дөләтләрни бозәк қилип, айропилан қатнишини тохтатмаслиққа қистиди. Нәтиҗидә вирус башқа дөләтләргә тарқалди. Чүнки, улар президент трамп қилғандәк қилмиди".

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт