Америка президенти доналд трампниң сода мәслиһәтчиси петир наваро 18-май күни хитайдин тарқалған таҗсиман вируси һәққидә сөз қилип, хитай һөкүмитиниң вирусни ғәрәзлик һалда башқа җайларға тарқатқанлиқини әйиблиди.
У ABC хәвәр агентлиқиниң зияритини қобул қилғанда «тунҗи бимар 2019-йили ноябирдила байқалған. Әмма хитай бу учурни дунядин икки ай йошурди. Арқидинла миңлиған хитай саяһәтчиләрни айропилан арқилиқ милан, ню-йорк қатарлиқ шәһәрләргә әвәтип вирусниң уруқини һәммила йәргә теривәтти» дегән.
Нөвәттә таҗсиман вирусиниң мәнбәси җиддий тәкшүрүлүватқан болуп, бу һәқтә техи ениқ бир йәкүн чиқирилмиғаниди. Наваро бу һәқтә сөз қилип бу вирусни әмәлийәттә хитайдики вақтидила пүтүнләй контрол қилишқа болидиғанлиқини, әмма хитай һөкүмитиниң дуня сәһийә тәшкилатини суйиистемал қилип, ғәрәзлик һалда иҗра қилған хата тәдбирлири түпәйлидин буниң һазир дуняви вабаға айлинип кәткәнликини, шу сәвәбтин буниңға пүтүнләй хитай һөкүмити җавабкар болуши лазимлиқини билдүргән.
Хитай һөкүмити һазирға қәдәр вирусқа қарши турушта «дуняви бирликсәп һасил қилиш» һәққидә сөз қиливатқан болсиму, изчил түрдә ташқи дуняниң вирус әвришкиси билән тәминләш һәққидики тәлипини рәт қилип кәлмәктә.
