Dunya sehiye teshkilati xitayni korona wirusining menbesini tekshürüshke hemkarlishishqa chaqirdi

Dunya sehiye teshkilatining bashliqi tédros adanom gébréyus seyshenbe küni xitayni teshkilatning korona wirusning menbesi toghrisidiki ikkinchi basquchluq tekshürüsh xizmitige téximu yéqindin hemkarlishishqa chaqirghan.

Dunya sehiye teshkilatining xitayda élip barghan birinchi basquchluq tekshürüshi bu yil féwralda axirlashqan we wirusning wuxendiki wirus tejribexanisidin tarqilish mumkinchiliki chong emes, belkim u sheperengdin tarqalghan bolushi mumkin, dep yekün chiqirilghan idi.

Doktor tédrosning éytishiche, xitay birinchi qétimliq tekshürüshte korona yuqumi tarqilishtin burunqi we uning deslepki basquchidiki bimarlargha a'it sanliq melumatlarni dunya sehiye teshkilatigha bermigen.

U yene, xitayni wuxendiki tejribixana heqqidiki melumatlarni ashkarilashqa chaqirghan we özining bir tébbiy xadim bolush süpiti bilen bundaq hadisilerning yüz béridighanliqini bilidighanliqini éytqan.

BBC Ning xewirige qarighanda, tédrosning bu sözliri dunya sehiye teshkilatining korona wirusining tejribixanidin tarqilip kétish nezeriyisini qollashni oylishiwatqanliqining eng küchlük ipadisi iken.

Korona wirusining xitayning wuxen wirus tetqiqati institutidin tarqalghanliqini toghrisidiki perezler ötken yili bashlan'ghan. Bu qarashlar yéqindin buyan yene bash kötürgen idi.

Halbuki, xitay bu heqtiki tekshürüshlerge qattiq qarshi turupla qalmay, korona wirusining chet'eldin kelgen wirus ikenlikini teshwiq qilishqa bashlighan.

Ötken ay amérika kéngesh palatasida korona wirusining menbesini sürüshtürüshke a'it ikki parche qanun layihesi tonushturulghan. Qanun layiheliride eger xitay hökümiti musteqil xelq'araliq tekshürüsh guruppilirining xitaygha bérip, wuxen wirus tetqiqat orni we bashqa tejribexanilirida korona wirusining menbesini tekshürüshige yol qoymisa, xitay hökümiti we xitay alimlirigha jaza yürgüzüsh teklipi otturigha qoyulghan.

Doktor tédros yene korona wabasining téxi axirlashmighanliqini bildürgen. Melum bolushiche mezkur wirusning yéngi we téximu xeterlik wariyantliri dunyaning herqaysi jaylirida körülüshke bashlighan.