Xitaydiki mashina hujumida ölgenler 11 ge yetti
2018.09.13
Birleshme agéntliqning 13-séntebirdiki xewirige qarighanda xunen ölkisining xéngyang shehiride bir kishi kechlik seylidiki kishiler topigha mashina bilen hujum qilghan, andin xenjer we gürjek kötürginiche uchrighanlar ademni chanashqa bashlighan. Netijide bügün'ge qeder shu qétimliq hujumda jem'iy 11 xitay ölgen. Yarilan'ghanlardin 44 kishi doxturxanida dawalanmaqta iken.
Xéngyang sheherlik hökümet bu heqtiki bayanatta “Jinayet gumandari ilgiri zeher etkeschiliki bilen shughullan'ghan. Oghriliq we bulangchiliq qilmishi sadir qilghan” dégen. Uning “Jem'iyettin öch élish üchün” bu qétimliq hujumni qozghighanliqini bildürgen.
Xewerde éytilishiche, 12-séntebir kechqurun jinayet gumandari, 54 yashliq yang zenyün ademler mighildap turghan “Xelq meydani” gha mashina heydiginiche signal bermestin yughuri sür'ette bösüp kirgen. Mashina tüwrükke üsüp toxtighandin kéyin yang zenyün mashinidin sekrep chüshüp ademlerge hujum qilghan. Pütkül heriketning xaraktéri 2013-yili béyjingda yüz bergen “Tyen'enmén'gha mashiniliq hujum qilish” weqesige pütünley oxshaydighan bolup, xitay hökümiti eyni waqitta bu hujumni “Jihad idiyesi bilen zeherlen'gen Uyghur térrorchiliri” ning qilghanliqini élan qilghan idi. Emma xéngyang shehiridiki oxshash hujumni xitay hökümitining térrorluq bilen eyiblimesliki kishilerning diqqitini qozghighanliqi melum.
Xewerde éytilishiche, shangxey, béyjing qatarliq jaylarda xitay puqralar mektep balilirigha hujum qilish, ayrodromda bomba partlitish dégendek qilmishlarni sadir qilip, nechche onlighan kishiler öltürülgen bolsimu xitay hökümiti bu ishlarni izchil “Rohiy késellik” yaki “Jem'iyettin öch élish” dégendek eyibler bilen xulasilep kelmekte iken.