Хитай һөкүмити ички малиманчилиқни пәсәйтиш салмиқини ашурмақта

“вашингтон вақти гезити” ниң 16-декабирдики хәвиригә қариғанда, йеқинқи мәзгилләрдә хитайниң ичкири өлкилиридә кәйни-кәйнидин йүз бериватқан пичақлиқ һуҗум, машинилиқ һуҗум қатарлиқлар хитай пуқралириниң җәмийәткә болған наразилиқини мәнбә қиливатқан болғачқа бу һал хитай һөкүмити әмәлдарлирини биарам қилишқа башлиған.

Хәвәрдә ейтилишичә, хитайдики күнсери күчийиватқан иҗтимаий наразилиққа қарита хитай әмәлдарлири бихәтәрлик тәдбирлирини күчәйтиш, шу арқилиқ дөләт иқтисадиниң сағлам раваҗлинишиға зит болған мәсилиләрни бастуруветишкә урунмақта икән. Хәвәрдә қәйт қилинишичә, хитай иқтисадниң тохтап қелиши вә давалғуш пәйда қилишини хитай әмәлдарлири вә пуқралири йеқинқи мәзгилләрдә әвҗ елишқа башлиған бир қатар зораванлиқ вәқәлирини көпәйтивәтти, дәп әндишә қилишқа башлиған.

Хәвәрдә көрситилишичә, хитай компартийәси мәркизий комитетиниң сиясий биюроси пуқралардики иқтисадий қийинчилиқ билән иҗтимаий давалғушниң бағлиниши барлиқини очуқ-ашкара етирап қилған. Шуниңдәк, әмәлдарларни “җәмийәтниң муқимлиқиға капаләтлик қилиш” мәқсити билән “хәлқ турмушини қоғдаш” қа буйруған.

Хитайдики иқтисадий вә сиясий җәһәттики бесимлар, шуниңдәк хитайда арқа-арқидин йүз бериватқан иҗтимаий паракәндичилик вә түрлүк қатиллиқ вәқәлири хитай һакимийитини сарасимигә селиватқанлиқи мәлум. Ваһаләнки, нөвәттә доналд трампниң йеңи кабент әзалириниң хитайға мурәссә қилмайдиған қаттиқ қол сиясәтчиләрдин тәшкил тепиватқанлиқи, шуниңдәк “сода уруши” ниң техиму қаттиқ шәкилдә башлиниш еһтималлиқи хитай һакимийитини техиму чоң сарасимигә селиватқан мәсилиләрниң бири дәп қаралмақта.