Бейҗиң сақчилириниң интернетқа қаратқан қамали күчәймәктә

Мухбиримиз ирадә
2014-10-09
Share

Бейҗиң сақчилири 2011-йилидин буян җәмий 30 миң кишини интернетқа алақидар җинайәтләр билән қолға алған.

Бүгүн шинхуа агентлиқи тәрипидин елан қилинған йеңи бир статистикида көрситилишичә, бейҗиң сақчи даирилири 2011-йилидин һазирғичә "интернет җинайәтчилиригә зәрбә берип, сап муһит яритиш" дәйдиған һәрикити давамида, интернетта җәмий 17 милйон "қанунсиз мәзмун" ни өчүргәнликини вә террорлуқ һәрикәтлиригә четишлиқи бар дәп қаралған 50 кишини қолға алғанлиқини билдүргән. Бирақ, шинхуа хәвиридә, бу террорлуқ вәқәлириниң тәпсилати вә қолға елинғанларниң кимлики һәққидә тохталмиған.

Улар, бу зәрбә бериш һәрикитиниң интернет җинайәтчилирини, өсәк сөз тарқатқанларни вә шундақла зораван-террорлуқ мәзмунидики нәрсиләр вә шуниңға четилидиған кишиләрни нишан қилғанлиқини билдүргән.

Бирақ, хәлқара кишилик һоқуқ органлири ши җинпиң һөкүмитиниң бу арқилиқ интернетқа қаратқан қамалини күчәйтип, пикир әркинликигә еғир зәрбә бериватқанлиқини билдүрмәктә. Болупму йеқинқи йиллардин буян хитай һөкүмити "интернетта қанунсиз диний материялларни, диний радикаллиқ вә террорлуққа аит материялларни көргән" дегән җинайәт билән нурғун уйғурларни қолға алған иди.

Шинхуаниң ейтишичә, даириләр бу йил 6-айғичә интернеттики террорлуққа аит 3300 мәзмунни, 728 үн-син материялини өчүрүп, 11 миң интернет башқурғучисини җазалиған.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт