Хитай мухбирлар әң көп қамақ җазасиға учрайдиған дөләт болуп баһаланди

Хитай дуняда мухбирлар әң көп қамаққа һөкүм қилинидиған дөләт болуп баһаланди.

11-Декабир күни мәркизи ню-йорктики мухбирларни қоғдаш комитети елан қилған йиллиқ доклатқа қариғанда, өткән бир йил мабәйнидә дуня миқясида қамақ җазасиға һөкүм қилинған мухбирлар сани 250 нәпәр болуп, буларниң 48 нәпири хитайда икән.

Хитайда қамаққа һөкүм қилинған мухбирлар асасән “дөләтни парчилашқа урунуш”, “һакимийәтни ағдурушқа қутратқулуқ қилиш” билән әйиблинидикән.

Мәзкур орган доклатида хитай һөкүмити уйғур елидә кәң көләмлик тутқунни қанат яйдуруп, бир милйондин ошуқ кишини йиғивелиш лагерлириға қамашқа башлиғандин кейин мухбирларниң асаслиқ зәрбә нишани болғанлиқини тәкитлигән. Доклатта қәшқәр уйғур нәшриятиниң 4 нәпәр хадиминиң тутқун қилинғанлиқи мисал қилип көрситилгән.

11-Декабир күни йәнә мухбирларни қоғдаш комитетиниң директори җол симон тивиттердики инкасида хитайниң дуняда мухбирлар әң көп җазалинидиған дөләт болуп баһаланғанлиқини әскәртип өткән, у “мана бу бизниң шинҗаң районида йүз бериватқан вәқәләрни хәвәр қилишниң ақивити һәққидики чүшәнчимизни шундақла әркин асия радийоси уйғур бөлүми мухбирлириниң пидакарлиқ билән қиливатқан хизмитигә болған чүшәнчимизни йәниму чоңқурлаштуриду,” дегән.

Мухбирларни қоғдаш комитетиниң доклатида хитай дунядики әң көп мухбир қамаққа елинған дөләт болуш сүпити билән 1-орунға тизилған. Хитайдин кейин түркийә, сәуди әрәбистан, мисир вә еритерийә қатарлиқ дөләтләр тизилған.