Xitayda korona wirusi bilen yuqumlan'ghuchilarning sani bir künde 20 mingdin éship ketken

Muxbirimiz irade
2022-04-07
Share

Xitay taratquliri 6-april küni sa'et 24:00 kiche bolghan ariliqta Uyghur élida 4 neper alametsiz yuqumlan'ghuchi bayqalghanliqini, bularning ikki nepirining ürümchide ikenlikini, qalghan ikki nepirining ichkiri xitay ölkisige qayturulghanliqini bildürgen.

Xitayning shinxu'a agéntliqi Uyghur aptonom rayonluq sehiye we saqliqni saqlash komitéti élan qilghan sanliq melumatqa asasen élan qilghan xewirige qarighanda, 6-april küni sa'et 0:00 din 24:00 giche, Uyghur élida (bingtu'enimu öz ichige alidu) omikronning yéngi wariyanti bilen yuqumlan'ghan alametsiz bimarlarning sani 51 neperge yetken. Bularning 19 nepiri ürümchide, 2 nepiri korlada, 23 nepiri xoshut nahiyeside, 7 nepiri sanjida iken.

Xitay miqyasida hazir korona wirusining omikron waryanti qattiq tarqiliwatqan bolup, xitayning döletlik sehiye komitéti 6-april küni bir kün ichide omumiy yuqumlan'ghuchilar sanining 20 ming 472 neperge yetkenlikini élan qilghan. Bu hazirghiche xitayda élan qilin'ghan eng yuqiri kündilik yuqum sani iken.

Firansiye agéntliqining xewer qilishiche, xitay hökümiti aldinqi heptidin bashlap 25 milyon nopusqa ige shangxey shehirini qattiq qamal qilghan bolsimu, emma yuqumlan'ghuchilarning 80 pirsenti yenila shangxeyde iken.

Qamal tedbirlirining rehimsizlerche yürgüzüluwatqanliqi shangxey ahalilirining küchlük naraziliqini qozghimaqta iken. Qamalgha a'it wehimilik körünüshler, ach qalghan ahalilar we yuqumlan'ghan balilarning ata-aniliridin tartiwélinishidek körünüshler ashkarilinip, xitay hökümitining wirusqa taqabil turush tedbirlirige so'al peyda qilghan idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet