Әнглийә баш министири сайлимиға чүшидиған парламент әзаси хитайға қаттиқ қол болидиғанлиқини билдүргән

Мухбиримиз җәвлан
2022.07.20
Share on WhatsApp
Share on WhatsApp

Әнглийә баш министири борис җонсон вәзиписидин истепа бәргәндин кейин, униң орниға чиқиш риқабитигә чүшкән парламент әзалиридин пенни мордонт (Penny Mordaunt) борс җонсонниң хитайға “юмшақ сиясәт” қолланғанлиқини әйиблигән вә әгәр өзи баш министир болуп қалса хитайға қаттиқ қол дипломатийә йүргүзидиғанлиқини билдүргән.

Express Гезитиниң хәвәр қилишичә, пенни мордонт әнглийә парламент сайлимида 92 беләт билән 2-орунда турған. Әгәр у бу сайламда утуп чиқса, хитай билән болған мунасивәтни тамамән өзгәртидиғанлиқини ейтқан. У мундақ дегән: “һазирқи һөкүмәт хитайға бәк юмшақ қоллуқ қилди, иқтисадий мәнпәәт мунасивитини хәлқара бихәтәрлик билән кишилик һоқуқниң үстигә қойди”.

Пенни мордонтниң қаришичә, уйғур районидики қәбиһ дәпсәндичилик, хоңкоңдики бастуруш вә тәйвәнгә һуҗум қилишқа урунуш қатарлиқлар хитайниң хәвп-хәтирини очуқ көрситидиған вәқәләр болуп, бу әһвалда хитай билән яхши мунасивәт орнитиш мумкин әмәс икән.

Пенни мордонт баш министер болғандин кейин йәнә әнглийәниң уйғур районидики кишилик һоқуқ җинайәтлиригә башчилиқ қилған әмәлдарлириға техиму көп җаза йүргүзидиғанлиқини, әнглийәдики ширкәтләр вә һөкүмәт органлириниң уйғур районидики кишилик һоқуқ дәпсәндичилики билән четишлиқи болған хитай ширкәтлири билән һәмкарлишишини чәкләйдиғанлиқини ейтқан.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.