Xitay xongkongda yürgüzüwatqan “Bir dölette ikki xil tüzüm” siyasitini emeldin qaldurushining mumkinlikidin bésharet bergen

Béyjingning xongkongda turushluq alaqilishish ishxanisi qanun bölümining bashliqi wang jénminning 29-aprél küni qilghan sözi xongkongdiki her sahe kishilerning diqqitini qozghighan.

U mundaq dégen: “Egerde beziler xongkongning aptonomiyesi arqiliq junggo bilen tirkeshse yaki döletning bu yerdiki mewjutluqigha tehdit salsa, herqandaq bir dölet ‛ikki xil tüzüm‚ ni dawamlashturushqa amalsiz qalidu.”

U yene mundaq dégen: “Xongkongning aliy muxtariyati hergizmu döletning birlikige zerer keltürmesliki kérek. Egerde ‛bir dölette ikki xil tüzüm‚ meghlup bolsa, xongkongning tartidighan ziyini elwette junggoning ziyinidin nechche hesse chong bolidu.”

U yene agahlandurup mundaq dégen: “Egerde beziler xongkongni junggogha qarshi bir bazigha aylandurmaqchi bolidiken, junggo hökümiti buninggha hergizmu süküt qilmaydu.”

Közetküchiler, wang jénminning yuqiriqi sözliri xitayning xongkonggha bergen aptonomiyesining uzaqqa baralmaydighanliqidin signal bermekte, dep hésablimaqta.