Xoten wilayiti “Gu'angdung soda-tijariti” mulazimet tori bilen hemkarliq kélishimi imzalighan

“Shinjang géziti” xitayche torining xewirige qarighanda, xoten wilayiti “Gu'angdung soda-tijariti” mulazimet torini bashquruwatqan xu'a xaw medeniyet, pen-téxnika cheklik shirkiti bilen hemkarliq kélishimi imzalighan.

Kélishim boyiche, “Gungdung soda-tijariti” mulazimet tori xoten qashtéshi we xoten chilinini tonushturup sétish supisi bilen teminlepla qalmay, xoten sayahetchilikini tereqqiy qildurush we xoten'ge meblegh chaqirish saheliridimu xoten wilayiti bilen hemkarlishidiken. Ikki terep yene xotenning ewzel tebi'iy bayliqidin paydilinip “Xoten ku'énlun sayahetchiliki”, “Xoten méwiliri mol-hosul pesli” témisida pa'aliyet uyushturushni pilanlighan.

Xu'a xaw medeniyet, pen-téxnika shirkitining diréktori lu shyawxung özidiki téxnika ewzelliki we shirketning kolléktip küchidin paydilinip xotenning tebi'iy bayliqlirini tonushturush, xéridar chaqirish we xoten wilayitining ewzel kesiplirini tereqqiy qildurush üchünmu küch chiqiridighanliqini, xotenning ela mehsulatlirini ichkiri xitaygha we xelq'aragha tonutidighanliqini bildürgen.

Xewerde körsitilishiche, “Gungdung soda-tijariti” tori eqliy iqtidar téxnikisini asas qilidighan, sanliq melumat ambiri we reqemlik mulazimet bilen teminleydighan, mehsulat bilen bazarni, hökümet bilen karxanini bir yerge élip kélidighan soda mulazimet supisi bolup, bu yil kirgendin buyan ürümchi, qeshqer, altay qatarliq köpligen jaylar bilen soda hemkarliqi kélishimi tüzüp, xéridar chaqirish we bazar échish saheside pa'aliyet qilip kelgen.

Uyghur rayonining weziyitige yéqindin diqqet qiliwatqan közetküchilerning qarishiche, “Gungdung soda-tijariti” mulazimet supisi Uyghur diyaridiki tebi'iy bayliqlarni tonushturup, téximu köp xitay karxanichiliri we sodigerlerni Uyghur rayonigha jelip qilishni közleydighan teshwiqat közniki bolup, téximu köp xitay puqralirini Uyghur rayonigha bérip bayliq toplashqa, hökümetke masliship u rayondiki xelqke tewe bolghan tebi'iy bayliqlarni talan-taraj qilishqa maslishish rolini oynaydiken.