Хотән вилайити муқимлиқни ишқа ашуруш үчүн хитайчә өгиниш һәрикити қозғиған

Мухбиримиз ирадә
2017-09-12
Share

Хотән вилайити "муқимлиқни ишқа ашуруп, мәңгүлүк әминликни бәрпа қилиш" дәйдиған нишанға йетиш үчүн әмдиликтә вилайәт тәвәсидә хитайчә сөзләш вә йезишни өгиниш һәрикити қозғашни қарар қилған.

"хотән гезити" ниң бу һәқтики хәвиридин қариғанда, бу һәрикәткә йеқиндин буян арқа-арқилап очуқ хәт елан қилиш вә аммини қәсәм бериш йиғинлириға уюштуруп хитай компартийисигә садақитини ипадиләштә өзини көрситиватқан хотән валийси езиз муса йетәкчилик қилидикән.

10-Сентәбир күни у вилайәттә "дөләт тили қурулушиға һәйдәкчилик қилиш йиғини" ечип, "дөләт тили" дәп атиливатқан хитай тилини билишниң әһмийитини тәкитләп, уни мәңгүлүк әминлик бәрпа қилишниң капалити, дәп көрсәткән.

Йиғинда чиқирилған қарарға асасән, бундин кейин һәрқайси наһийиләр чоқум бу һәқтики тәшвиқат хизмәтлирини қаттиқ күчәйтип, чоқум һәрбир аз санлиқ милләт кадир вә ишчи-хизмәтчисиниң чоқум MHK хитай тили сәвийә имтиһаниға қатнаштуруп, лаяқәтлик болушиға капаләтлик қилиши, йеза кадирлири вә деһқан-чарвичи аммини болса дөләт тил-йезиқ сәвийәсини синаш имтиһаниға орунлаштуруши керәк икән.

Йиғинда, болупму наһийә тәвәсидики 45 яштин төвән аз санлиқ милләт кадир ишчи-хизмәтчилириниң хитай тили оқушиға орунлаштуруш вә уларни 2018-йилиниң ахириғичә хитай тили сәвийә имтиһаниниң иккинчи а дәриҗилик сәвийисигә, 2019-йилиниң ахириғичә иккинчи б дәриҗилик сәвийигә йәткүзүш тәләп қилинған.

Техи йеқинда, уйғур районлуқ маарип назарити бу йиллиқ оқуш мәвсумидин башлап уйғур районидики барлиқ толуқсиз оттура мәктәпләрниң 1‏-йиллиқлириға вә башланғуч мәктәптики йәрлик милләт оқуғучилириға омумйүзлүк хитай тилида дәрс өтүшни қарар қилип, ана тилда дәрс аңлаш, дәрслик материяллирини ана тилда оқушқа хатимә бәргән иди. Хитай тилини асас қилған "қош тил йәсли қурулуши" му уйғурлар әң зич олтурақлашқан җәнубтики үч вилайәт бир областта қаттиқ елип берилған иди.

Чәтәлләрдики көзәткүчиләр, хитай һөкүмитиниң уйғур тилини йоқ қилиш үчүн барлиқ амалларни ишқа селиватқанлиқини билдүрмәктә.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт