Xitay hökümiti ürümchidiki pütün ahaliler rayonlirida "Yépiq bashqurush" yolgha qoyulidighanliqini élan qildi

Muxbirimiz erkin
2020-08-07
Élxet
Pikir
Share
Print

Xitay hökümiti ürümchi shehiridiki her qaysi mehelle we ahaliler olturaq rayonlirining kirish-chiqish éghizlirining birdek qamal qilinip, "Yépiq bashqurush" yolgha qoyidighanliqini élan qildi. Xitaydiki "Junggo xewerliri tori" ning bildürüshiche, da'iriler ürümchidiki her qaysi mehelle we olturaq rayonlarda peqet birla ishik qoyulup, yuqum xizmiti we alahide ehwallarning sirtida herqandaq shexsning sirtqa chiqishi we kirishi cheklinidighanliqini bildürgen.

Ürümchi sheherlik hökümetning 6-iyul ötküzgen axbarat yighinida sheherlik hökümetning mu'awin bash katipi shang yülen, bu qarar "Yuqumning tarqilishining aldini élish, uning tarqilish yolini üzüsh üchün élin'ghanliqi" ni bildürgen. Xewerde tekitlinishiche, u "Pütün sheherdiki keng ammining maslishishi astida biz barliq ahaliler rayonlirigha qarita yépiq bashqurushni yolgha qoyimiz" dégen. Uning tekitlishiche, eger ahaliler nerse-kérek zakaz qilsa, uni kirish-chiqish éghizidiki mexsus xadimlar tapshuruwélip, andin igisige yetküzüp bérilidiken.

U yene her bir ahalining künde 3 qétim qizzitmisi tekshürülidighanliqi, binormal ehwal bayqalsa derhal ijtima'iy rayon'gha xewer qilinip, qa'idige asasen bir terep qilinidighanliqini bildürgen. 7-Ayning otturilirida korona wirusi yuqumi ürümchide qayta tarqilip, da'iriler wuxende yolgha qoyghan qattiq karantin tedbirlirini yürgüzgen. Bu chet'eldiki Uyghurlarda xitay hökümiti yuqumni bahane qilip, özining Uyghurlarni téximu qattiq teqiplesh pilanini ijra qiliwatamdu, dégen guman qozghighanidi.

Toluq bet