Уйғур елиниң ақчи наһийәсидә 17-өктәбир әтигәндә 5.3 Бал оттура һал йәр тәвригән

Уйғур елиниң ақчи наһийәси 17-өктәбир күни әтигәндә йүз бәргән оттура һал йәр тәврәштә йәнә қаттиқ силкингән. “хитай дөләтлик йәр тәврәшни өлчәш мәркизи” ниң торида елан қилинған учурда, 17-өктәбир әтигән саәт 6 дин 23 минут өткәндә йүз бәргән бу қетимлиқ йәр тәврәшниң 5.3 Бал икәнлики, тәврәш мәркизи чоңқурлуқиниң 10 километир икәнлики қәйт қилинмақта. Хитай һөкүмәт таратқулириниң хәвәрлиридә, йәр тәврәштә талапәткә учриған адәм вә мал-мүлүк һәққидә һазирға қәдәр һечқандақ мәлуматниң йоқлуқи билдүрүлгән. “шинхуа агентлиқи” ниң бир рәсимлик хәвиридә, “ақчи наһийәлик оттин мудапиәлиниш вә қутқузуш әтрити” қатнаш йоли понкити хадимлириниң аилиләргә кирип талапәт әһвалини тәкшүрүватқанлиқи билдүрүлгән.

Бу ақчи наһийәсидә бу йил 2-айдин бери йүз бәргән оттура һал дәриҗидики 2-қетимлиқ йәр тәврәш һесаблиниду. Бу йил 1-айниң 30-күни йүз бәргән 5.7 Бал йәр тәврәшму, һазирқи йәр тәврәш мәркизигә йеқин җайда йүз бәргән. Хитай таратқулириниң йәр тәврәш һәққидики хәвәрлири һөкүмәт учурлирини мәнбә қилған болуп, йәр тәврәшниң тәпсилатиға даир һечқандақ учур берилмигән. Хитай һөкүмитиниң уйғур елидә йүз бәргән тәбиий апәтләргиму “сәзгүр мәсилә” қатарида қарап, униңда даир учурларни қаттиқ контрол қилидиғанлиқи, торда учур тарқатқанларни “иғва” тарқатти дәп җазалайдиғанлиқи мәлум.

Хитай “нур” гезитиниң қәйт қилишичә, бу қетимлиқ йәр тәврәшниң мәркизи ақчи наһийә базириға 22 километир, учтурпан наһийәсигә 59 километир келидикән. Хәвәрләрдә, йәр тәврәшниң ақчи наһийә базири, учтурпан, атуш, ақсу, қәшқәр қатарлиқ җайларда сезилгәнлики қәйт қилинмақта. Мәлум болушичә, бу қетимлиқ йәр тәврәштә тәврәш мәркизиниң 5 километир даириси ичидә бир кәнт, 20 километир даириси ичидә ақчи наһийә базири бар икән.

“хитай дөләтлик йәр тәврәшни өлчәш мәркизи” ниң торида елан қилинған учурлардин мәлум болушичә, бу қетимлиқ йәр тәврәш мәркизиниң 200 километир даириси ичидә йеқинқи 5 йилдин бери, үч балдин юқири 388 қетим йәр тәвригән. Әң қаттиқ бир қетимлиқ йәр тәврәш 2024-йили 1-айниң 23-күни учтурпанда йүз бәргән. Хитай йәр тәврәшни өлчәш даирилири шу қетимлиқ йәр тәврәш күчини 7.1 Бал дәп елан қилған.