Һәптилик хәвәрләр (27декабирдин 2-январғичә)

Мухбиримиз қутлан
2015-01-02
Share
erkin-asiya-radiosi.jpg Әркин асия радиоси уйғур бөлүми һәптилик хәвәрлири
Photo: RFA

Америкадики уйғур җамаити җәм болуп 2015-йилни күтүвалди

31-Декабир күни кәчқурун америкидики уйғур җамаити пайтәхт вашингтон әтрапида җәм болуп 2015-йилини дағдуғилиқ күтүвалди.

Бу қетимлиқ йеңи йилни күтүвелиш паалийитини америка уйғур бирләшмиси уюштурди. Мәзкур паалийәткә вашингтон әтрапида олтурақлашқан уйғур җамаити вә америкиниң башқа штатлиридин кәлгән уйғурлар қатнашти.

Мәзкур паалийәт башлиниши билән дуня уйғур қурултийиниң рәиси рабийә қадир ханим тәбрик сөзи сөзлиди. У сөзидә америкидики вә уйғурлар вәтинини өз ичигә алған пүтүн дунядики уйғурларниң йеңи йилини тәбриклиди.

Паалийәт давамида уйғур сәнити бойичә мол мәзмунлуқ программилар көрситилип, америкида өсүп-йетиливатқан яш әвлад уйғурларға миллий мәдәнийәт вә миллий кимлик қәдирийәтлири һес қилдурулди.

Кәлпин вәқәси һәққидә торға учур йоллиған бир уйғур 17 йиллиқ қамаққа һөкүм қилинған

Игилишимизчә, даириләр учтурпан наһийисидә олтурушлуқ бир уйғур яшни кәлпиндә наһәқ етиветилгән 17 яшлиқ абдулбаситниң өлүм хәвирини үндидарға йоллиғанлиқи сәвәблик 17 йиллиқ қамақ җазасиға һөкүм қилған.

Мәлум болушичә, әйни вақитта кәлпин хәлқидин башқа ақсу, учтурпан вә башқа қошна наһийәләрдики уйғур яшлириму абдулбаситниң наһәқ өлүмигә күчлүк инкас қайтурған.

Радиомизниң хәвәр тепишичә, учтурпанда олтурушлуқ бир уйғур яш бу вәқә һәққидә үндидарға учур йоллиған. У бу учурида уйғурларниң бундақ наһәқчиликкә йәнә сүкүт қилмаслиққа чақирған.

Аридин узун өтмәй бу киши учтурпанда тутқун қилинғанлиқи вә 17 йиллиқ муддәтлик қамақ җазасиға һөкүм қилинғанлиқи мәлум.

3 яшлиқ абдулла тайланд дохтурханисида 45 күн ялғуз йетип қаза қилған

3 яшлиқ абдулланиң туберкулйоз кесәллики билән тайландтики мәлум бир дохтурханида қаза қилиши муһаҗирәттики уйғур җамаәтчиликидә күчлүк инкас пәйда қилди.

Бу хәвәр әң дәсләп “баңкок вақит гезити” дә елан қилинғандин кейин, әһвалдин хәвәрдар кишиләр радиомиз зияритини қобул қилип, бу вәқәниң тәпсилати һәққидә учур бәрди.

Мәлум болушичә, 3 яшлиқ абдулла 10 айдин буян тайландтики тутуп туруш орнида еғир күнләрни бешидин өткүзгән вә туберкулйоз кесилигә гириптар болған. У дохтурханиға елип берилғандин кейин ата-аниси яки башқа һечқандақ уруқ-туғқини болмиған шараитта 45 күн йетип, тәнһа һалда аләмдин өткән.

Абдулланиң мейити һазир тайландтики мәлум дохтурханиниң җәсәт сақлаш тоңлатқусида турмақта икән.

Рабийә қадир ханим хитай һөкүмитини д у қ билән сөһбәт өткүзүп, уйғур мәсилисини тинч усулда һәл қилишқа чақирди

Дуня уйғур қурултийиниң рәиси рабийә қадир ханим “америка авази” вә “әркин асия радиоси” да сөһбәт елан қилип, хитай һөкүмитини шәрқий түркистан мәсилиси бойичә сөһбәткә келишкә вә уни тинчлиқ билән һәл қилишқа чақирди.

Рабийә ханим сөзидә 2014‏-йилиниң уйғурлар үчүн интайин қабаһәтлик вә еғир бәдәлләрни төлигән бир йил болғанлиқини илгири сүрди.

Вәһаләнки, у уйғур хәлқиниң тарихтики әң қийин болған бу реаллиқ ичидин ойғинип, қабаһәтлик имкансизлиқни йеңәләйдиғанлиқини һәмдә кәлгүсигә нисбәтән үмидварлиқ билән қарайдиғанлиқини билдүрди.

Рабийә қадир ханим йәнә, хитай һөкүмити билән хитай хәлқини уйғурларниң өз һәқ-һоқуқлирини тәләп қилишқа һәқлиқ икәнликини чүшинишкә чақирди. Шуниң билән биргә йәнә хитайниң уйғурларни бастуруш арқилиқ дуняда һечқачан ишәнчкә вә һөрмәткә сазавәр дөләт болалмайдиғанлиқини тәкитлиди.

Нур бәкри уйғур аптоном райониниң рәисликидин қалдурулуп хитай дөләтлик енергийә идарисиниң башлиқлиқиға йөткәлгән

Уйғур аптоном райониниң рәиси нур бәкри 31-декабир күни рәислик вәзиписидин қалдурулуп, хитай дөләтлик тәрәққият-ислаһат комитетиниң муавин мудири һәм енергийә идарисиниң башлиқи вәзиписигә йөткәлгән.

Хәвәрдә дейилишичә, уйғур аптоном районлуқ хәлқ қурултийи даимий комитетиниң мудири шөһрәт закир нур бәкриниң рәислик вәзиписини өткүзүвалған.

Хитай компартийәси нур бәкригә юқири баһа берип, униң “интайин қабилийәтлик аз санлиқ милләт кадири” икәнликини тәкитлигән.

Һалбуки, хәлқарадики көзәткүчиләр вә муһаҗирәттики уйғур җамаәтчилики нур бәкри уйғур елида қорчақ рәис болған 7 йилда мутләқ көп санлиқ уйғурларниң изчил наразилиқ вә тәнқид обйекти болуп кәлгәнликини илгири сүрмәктә.

Даириләр илһам тохтиниң аилисигә уни 6 айғичә йоқлашқа болмайдиғанлиқи уқтурған

Муддәтсиз қамаққа һөкүм қилинған илһам тохтиниң мәһбуслар бәһримән болушқа тегишлик әң төвән һоқуқ ‏- аилисидикиләр билән қәрәллик көрүшүш имканийитидин мәһрум қилиниши җәмийәттә қаттиқ наразилиқ қозғиған.

Илһам тохтиниң аяли гүзәлнур ханимниң радиомизға билдүрүшичә, қамақтики илһам тохти 12-декабир күнидин башлап үрүмчи 1-түрмисигә йөткәлгән.

Түрмә даирилири гүзәлнур ханимға язма уқтуруш әвәтип, 2015-йил 6-айниң 15-күнигә қәдәр униң вә башқа уруқ-туғқанлириниң түрмигә келип илһам тохтини йоқлишиға болмайдиғанлиқини уқтурған. Униңда йәнә түрмә сиртидин илһам тохтиға кийим-кечәк әвәтишкиму рухсәт қилинмайдиғанлиқи алаһидә әскәртилгән.

Гүзәлнур ханим түрмә даирилиригә телефон қилип сәвәбини сүрүштүргән болсиму, лекин қайил қиларлиқ җавабқа еришәлмигән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт