Heptilik xewerler (5-dékabirdin 11-dékabirghiche)

Muxbirimiz qutlan
2015-12-11
Share
erkin-asiya-radiosi.jpg Erkin asiya radi'osi Uyghur bölümi heptilik xewerliri
Photo: RFA

Rabiye qadir xanim dunya kishilik hoquq künide lentos kishilik hoquq mukapatini tapshurup aldi

10‏-Dékabirdiki dunya kishilik hoquq künide, Uyghur milliy herikitining rehbiri rabiye qadir xanim bashqa ikki neper mukapat sahibi bilen birlikte 2015-yilliq lentos xelq'araliq kishilik hoquq mukapatini tapshuruwaldi.

Bu yilliq tom lentos kishilik hoquq mukapatini tarqitish murasimi amérika dölet mejlisige qarashliq kanon sariyida ötküzüldi.

Murasimgha amérika dölet mejlisining ezaliri, kishilik hoquq pa'aliyetchiliri, kishilik hoquq teshkilatlirining wekilliri shundaqla bir qisim Uyghur pa'aliyetchiler qatnashti.

Rabiye qadir xanim murasimda söz qilip, "Bu, Uyghur xelqining öz heq-hoquqliri we erkinliki üchün qilghan küreshlirining xelq'arada yene bir qétim étirap qilinishidur," dédi.

Gumidiki oqutquchilar tetil we dem élish künliride nopus éniqlash ishigha sélinmaqtiken

Igilishimizche, bu yilliq yazliq tetil mezgilide guma nahiyesining bir qisim yézilirida oqutquchilar nopus éniqlash, nopus tizimlash we kent ahalilirining arxipini turghuzushtek bir qatar ishlargha sélin'ghanliqi melum.

Guma nahiyesidin radi'omiz ziyaritini qobul qilghan bir qisim oqutquchilar ikki yildin buyan yerliktiki oqutquchilarning dem élish we tetil künliride normal dem élip baqmighanliqini bildürdi.

Melum bolushiche, nopus éniqlash eslide saqchixanilarning wezipisi bolsimu, lékin yerlik da'iriler bu wezipini oqutquchilargha yüklep qoyghan. Saqchixanilarning pütün küchini ishqa sélip peqetla "Muqimliq" qa kapaletlik qilishi telep qilin'ghan.

Gumidiki yerlik saqchixanilarmu bu ehwalning rastliqini delillidi.

Amérika Uyghur kishilik hoquq programmisi bayanat élan qilip xelq'ara jem'iyetni Uyghur siyasiy mehbuslar untup qalmasliqqa chaqirdi

10-Dékabir "Dunya kishilik hoquq küni" munasiwiti bilen amérika Uyghur kishilik hoquq programmisi bayanat élan qilip, dunya jama'etchilikini Uyghur siyasiy mehbuslarning ehwaligha diqqet qilishqa we ularning qoyup bérilishi üchün heriket élip bérishqa chaqirdi.

Ilham toxti, gheyret niyaz we atikem rozi qatarliq 8 neper siyasiy mehbusning isimliki tilgha élin'ghan mezkur bayanatta, ularning oxshimighan siyasiy köz qarash we meydanini ipadiligenliki üchünla xitay türmiside yétiwatqanliqi eskertildi.

Bayanatta yene xelq'ara jem'iyet mezkur siyasiy mehbuslarning qoyup bérilishi üchün xitay dölet rehberlirige mektup yollashqa we imza toplashqa dewet qilindi. Dunyaning Uyghur siyasiy mehbuslarni untumaydighanliqini xitay terepke eslitip turushning zörürlüki tekitlendi.

Ürümchi bazarlirida yamrighan saxta tuzdin köpligen Uyghurlarning xewersiz yürgenliki melum bolmaqta

Sana'etke ishlitilidighan tuz xam eshya qilin'ghan saxta tuzning ürümchi bazarlirida yillardin buyan sétilip kelgenliki melum bolmaqta.

Igilinishiche, yéqinqi yillardin buyan yémek-ichmek bixeterliki xitaydiki, bolupmu Uyghur éli qatarliq az sanliq milletler rayonliridiki köp körülüwatqan mesililerning birige aylan'ghan.

Insanlarning salametlikige intayin ziyanliq bolghan bu xil tuz mehsulati yéqindin buyan ürümchide köplep bayqalghan. Halbuki, ürümchidin radi'omiz ziyaritini qobul qilghan Uyghurlarning köp qismi bu ishtin xewersiz ikenlikini, sana'ette ishlitidighan tuzdin teyyarlan'ghan bu xil tuz mehsulatining adem bedinige élip kélidighan ziyinidin xewersiz ikenlikini bildürdi.

9 Yashliq qiz munire memetning bay hujumchiliri yoshurun'ghan öngkürde köyüp ölgenliki ashkarilandi

Igilinishiche, xitay qoralliq küchliri teripidin baydiki tagh öngküride köydürüp öltürülgenler ichide 9 yashliq Uyghur qiz munire memetning barliqi melum.

Teweliktiki kent mes'uli we yerlik ahalilerning radi'omizgha bildürüshiche, munire qorsaqtiki waqtida pilanliq tughut seweblik chüshürülüwétish xewpige duch kelgen iken. Tughulush aldidiki bowaqni saqlap qélish üchün bay kömürkan hujumchiliridin memet eysa eyni waqitta munirening ata-anisini tagh öngkürige yoshurup tughdurghaniken. Kéyinche bowaqni memet eysaning béqiwalghanliqi melum.

Bu yil 18-séntebir baydiki kömürkan hujumidin kéyin gumandar memet eysa béqiwalghan qizi munireni özi bilen bille élip qachqan. Netijide 9 yashliq munire memet özi tughulghan tagh öngküride xitay qoralliq küchlirining ot hujumida hayatidin ayrilghan.

Uyghur xelq tarixiy dastanliri dunya ilim sahesining küchlük diqqitini qozghimaqta

Uyghur xelq tarixiy dastanliri we Uyghurlarda bügün'giche dawamliship kelgen dastanchiliq en'enisining dunya ilim saheside küchlük qiziqish qozghawatqanliqi melum.

Melum bolushiche, Uyghurlarning yéqinqi zaman tarixida meydan'gha kelgen "Yachiwek", "Abduraxman xan pasha", "Nuzugum" qatarliq tarixiy dastanlirini yuqiri maharet bilen éytalaydighan hayat dastanchilarning hélihem xoten we qumul rayonida mewjutluqi bilinmekte.

Uyghur xelq tarixiy dastanliri heqqide pikir bayan qilghan Uyghur bilim ademliri tarixiy dastanchiliq sen'itining Uyghurlardiki aghzakiy tarixchiliq en'enisining eng yarqin ipadisi ikenlikini ilgiri sürmekte.

Pikirler (0)

Barliq pikir - bayanlarni körüsh.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet