Түркийәниң 2018-йиллиқ оқуш мукапатиға илтимас қилиш рәсмий башланди

Ихтиярий мухбиримиз әркин тарим
2018-04-16
Елхәт
Пикир
Share
Принт
Түркийәниң 2018-йиллиқ оқуш мукапатиға илтимас қилиш тоғрисидики уқтуруш.
Түркийәниң 2018-йиллиқ оқуш мукапатиға илтимас қилиш тоғрисидики уқтуруш.
turkiyeburslari.gov.tr

Түркийә баш министирлиқиға қарашлиқ чәтәлләрдики түркләр вә қериндаш милләтләр башқармисиниң тор бетидики еланға асасланғанда, түркийәниң 2018-йиллиқ толуқ курс бойичә оқуш мукапатиға илтимас қилиш 4-айниң 16-күни рәсмий башланди.

Мәзкур илтимас қилиш 5-айниң 14-күнигичә бир ай давамлишидиған болуп, буниңға чәтәлдики хитай паспорти бар уйғур оқуғучиларму илтимас қилса болидикән. Илтимас қилғучилардин кимләрниң түркийә дөлитиниң оқуш мукапат пулиға еришкәнлики, 2018-йили 24-июл күни елан қилинидикән.

Мәзкур тор бетидики еланда дейилишичә, бакалаврлиқ үчүн илтимас қилидиғанларниң яш чәклимиси 1997-йили 1-айниң 1-күнидин кейин туғулған болуши керәк икән. Буниңдин башқа йәнә немә шәртләрни тәйярлиши керәк? мәркизи истанбулда турушлуқ уйғур академийәси баш катипи дилнур қәшқири ханим бу һәқтә мәлумат бәрди.

Дилнур қәшқири ханим түркийә дөлити тәрипидин бериливатқан бу оқуш пулиниң немиләрни өз ичигә алидиғанлиқи тоғрисида мәлумат бәрди. Мәзкур идариниң бу һәқтики елани вә дилнур қәшқириниң ейтишичә, оқуғучиларниң айлиқ оқуш мукапати 700 түрк лираси, йәни тәхминән 180 америка доллири вә бир йил түркчә өгиниш һәқсиз болидикән.

Уйғур академийәси муавин рәиси әхмәтҗан полат әпәнди һазир мисирдин вә башқа бәзи дөләтләрдин келип түркийәдә оқуш пурсити күтүватқан көп санда оқуғучи барлиқини, буларниң ичидә шәрти тошқанларниң буниңға илтимас қилса болидиғанлиқини баян қилди.

Һазир кастамону университетида оқуватқан субинур өмәр түркийә уйғурларниң оқуши үчүн яхши дөләт икәнликини, түркчә уйғурчиға йеқин болғачқа тил өткилидин өтүшниң асанлиқини, 700 түрк лираси оқуш мукапат пулиниң айлиқ турмушқа йетидиғанлиқини баян қилди.

2017-Йили түркийәдә бакалаврлиқ, магистирлиқ вә докторлуқ унванлири үчүн оқушқа 192 дөләттин 100 миң әтрапида оқуғучи илтимас қилған болуп, буниң ичидин тәләпкә лайиқ болған 7 миң әтрапида оқуғучи қобул қилинған.
Һазирқи вәзийәткә асасланғанда бу йил уйғур оқуғучилар уйғур дияридин биваситә келәлмәйдикән.

Түркийәдә баш министирлиқ тармиқидики чәтәлләрдики түркләр вә қериндаш милләтләр башқармисиниң оқуш мукапат пули бериш сиясити 2012-йили башланған болуп һазирғичә буниңдин бәһримән болған уйғур оқуғучиларниң сани 500 әтрапида икән.

Пикирләр (0)
Share
Толуқ бәт