"Uyghur akadémiklar kéngishi" resmiy quruldi

Ixtiyariy muxbirimiz erkin tarim
2017-11-17
Élxet
Pikir
Share
Print
Uyghur akadémiye torbéti körünüshi.
Uyghur akadémiye torbéti körünüshi.
akademiye.org

Xitayning Uyghurlargha élip bériwatqan bésim siyasiti üzlüksiz küchiyiwatqan, Uyghur tili, Uyghur milliy ma'aripi cheklimige uchrawatqan bügünki künde merkizi istanbuldiki Uyghur akadémiyisi 11-noyabir küni mexsus yighin ötküzüp, Uyghur akadémiklar kéngishi qurulghanliqini jakarlidi.

Mezkur akadémiyening tarmiqida qurulghan Uyghur akadémiklar kéngishining re'islikige doktor rishat abbas borhan, ijra'iye re'islikige abdulhemit qaraxan teyinlen'gen. Ziyaritimizni qobul qilghan Uyghur akadémiyisining re'isi ablimit qaraxan ependi, bir yildin köprek tirishchanliq netijiside muhajirette yashawatqan Uyghur serxilliri ichidiki 29 kishidin terkib tapqan, Uyghur akadémiyisining omurtqisi hésablan'ghan Uyghur akadémiklar kéngishini qurup chiqqanliqini bayan qildi.

Uyghur akadémiklar kéngishining ijra'iye re'isi abdulhemit qaraxan ependi Uyghur akadémikler kéngishi ezalirining hoquqi we mejburiyetliri toghrisida toxtaldi. 

Uyghur akadémiklar kéngishi re'is, danishmenler hey'iti, ijra'iye re'isi we kéngesh ezaliridin terkib tapqan bolup, doktor rishat abbas borhan re'islikke, doktor erkin sidiq, doktor shöhret mutellip we proféssor alimjan inayet ependiler danishmenlikke teyinlendi. 

Uyghur akadémiyesi qarmiqidiki akadémiklar kéngishige amérika qoshma shtatliri, türkiye, yawropa döletliri, ottura asiya türkiy jumhuriyetliridin bolup doktorluq ilmiy unwani alghandin kéyin ilim saheside melum netije yaratqan 29 kishi ezaliqqa teyinlen'gen. Akadémiklar kéngishige bundin kéyinmu sherti toshqan Uyghur ziyaliyliri eza bolalaydiken. Abdulhemit qaraxan ependi bu heqte toxtilip tepsiliy melumat berdi. 

Izmirdiki ege uniwérsitétining proféssori alimjan inayet ependi chet'ellerdiki Uyghur ziyaliylirining küchini toghra nishan üchün xizmet qildurushta Uyghur akadémiklar kéngishi rolining zor bolidighanliqini alahide tekitlidi. 
Uyghur akadémiyisining re'isi abdulhemit qaraxan ependimu Uyghur akadémiklar kéngishining Uyghur ziyaliyliri arisida köwrüklük rol oynaydighanliqini ilgiri sürdi.

Toluq bet