Алматада хәлқара балиларни қоғдаш күни хатириләнди

Ихтиярий мухбиримиз ойған
2017-06-02
Share
qelbinur-roziyewa.jpg Хәлқара балиларни қоғдаш күни мурасимини уюштурғучиларниң бири, "аламәт" филим ишләш мәркизиниң мудири қәлбинур розийева(солдин биринчи) мәзкур мурасимида. 2017-Йил 1-июн, алмата.
RFA/Oyghan

1-Июнда қазақистанниң барлиқ шәһәрлиридә хәлқара балиларни қоғдаш күни хатириләп өтүлди. Шу җүмлидин алмата шәһириниң җумһурийәт мәйданидиму тунҗи қетим 5000 оқуғучиниң қатнишиши билән яшлар вә өсмүрләрниң сәнәт гуруппилириниң тәнтәнилик парати өтти. Балилар күнигә беғишланған бу паалийәтләрниң мәқсити мәмликәт президенти илгири сүргән "мәңгүлүк әл" идийиси астида мәктәп вә алий оқуш орунлири оқуғучилирида вәтәнпәрвәрлик, бирлик туйғулирини тәрбийиләштин ибарәт болди. Мәзкур байрамға беғишланған һәр хил паалийәтләр шәһәрниң дәм елиш бағчилирида, мәйданлирида өткүзүлди.

Шу мунасивәт билән, қазақистан хәлқи ассамбилейисиниң достлуқ өйидә қазақистан уйғурлириниң җумһурийәтлик етно-мәдәнийәт мәркизи чоң тәнтәнилик мурасим уюштурди. "сәбий дилларда шатлиқ садаси" дәп аталған бу мурасимни җумһурийәтлик уйғур мәдәнийәт мәркизи рәисиниң орунбасари йершат әсмәтоф тәбрик сөз билән ечип, қазақистан парламенти алий кеңишиниң әзаси шаһимәрдан нурумофниң салимини йәткүзди һәм барлиқ меһманларни қизғин тәбриклиди. Мурасимда сөзгә чиққан рус, түрк вә башқиму мәдәнийәт мәркәзлири, җәмийәтлик бирләшмиләр вәкиллири қазақистандики милләтләр достлуқи, динлар ара разимәнлик, бирлик, иттипақлиқ һәққидә өз қарашлирини оттуриға қоюп, мурасимни уюштурғучиларға миннәтдарлиқини изһар қилди.

Радийомиз зияритини қобул қилған җумһурийәтлик уйғур мәдәнийәт мәркизи йенидики ханим-қизлар кеңишиниң рәиси сәнәм бешированиң ейтишичә, уйғур мәдәнийәт мәркизи өз алдиға шәһәрдики мәҗруһ балиларға, балилар өйлиридә тәрбийилиниватқан йетим балиларға, шундақла һал-оқити начар һәм көп балилиқ аилиләрниң балилириға маддий вә мәниви ярдәм көрситишкә охшаш вәзипиләрни қойған болуп, бу қазақистан һөкүмити тәрипидин һәртәрәплимә қоллап-қуввәтләнмәктә. Бу қетимқи мурасимни өткүзүшкә мәдәнийәт мәркизиниң наһийилик шөбилири, "нураний анилар", "җанан" хәйрхаһлиқ фондлири, болупму қазақистан уйғур яшлири бирлики йеқиндин ярдәм көрсәтти. С. Беширова хәйрхаһлиқ тәшкилатлардин ташқири тиҗарәтчиләрниң, айрим сахавәтлик инсанларниң даим мундақ ишларда өзлириниң ярдәм қолини созуп келиватқанлиқини алаһидә тәкитлиди. У шундақла бүгүнки дуня вәзийитиниң интайин мурәккәплишип, сүрийә, ирақ, афғанистан вә башқиму уруш болуватқан мәмликәтләрдә бигунаһ балиларниң оқ астида қеливатқанлиқиға ечинип, мундақ деди: "қазақистанда президентимиз әң алди билән тинчлиқни, достлуқни, бирликни мәқсәт қилип қойғанлиқтин биздә ундақ ишлар йоқ. Қазақистанда һечқачан уруш болмисун, балилиримизниң көзлиридә яш болмисун, анилар йиғлимисун. Шуниң үчүн барлиқ милләтләр бирлишип, мушу достлуқни сақлашта президентимизниң шу сияситини қоллап-қувәтләватимиз. Шу җүмлидин биз, уйғур анилириму, балилиримизни тәрбийиләп, бир кишилик һәссимизни қошуп келиватимиз."

С. Беширова шундақла пәрзәнтлирини ташлап, уларниң бәхтигә палта чепиватқан атиларни, болупму аниларни инсанийлиққа, меһир-шәпқәткә чақирип, һәр бириниң өз вәзиписигә җавабкарлиқ билән қарашниң, җәмийәтниң аңлиқ әзалири болуп қелишниң муһимлиқини тәкитлиди.

Мурасимни уюштурғучиларниң бири "аламәт" филим ишләш мәркизиниң мудири қәлбинур розийева мәзкур мурасимға һәр хил милләт вәкиллириниң қатнашқанлиқини, уларниң қазақистан хәлқиниң бирликини, иттипақлиқини көрситидиған көплигән сәнәт номурлирини намайиш қилғанлиқини оттуриға қоюп, мундақ деди: "бизниң омақ вә талантлиқ балилиримиз сүрәт сизип, өз һүнәрлирини көрсәтсә, уссулчи йигит-қизлиримиз сәһнидә мусабиқиләргә чүшүп, байрам бәк қайнап кетиватиду. Сүрәт сизиш мусабиқиси ‹мениң қазақистаним' дәп атилип, балилар ички дунясини шу сүрәтләрдә көрсәтти. ‹Келиңлар, уссул ойнайли' дегән паалийәттиму уссулчилиримиз һәммисиниң көңлини алди."

Қ. Розийеваниң ейтишичә, бу паалийәткә қатнашқанларниң арисидин, болупму алмата шәһиридики уйғур тилида билим беридиған мәктәпләр оқуғучилириниң таланти көпчиликниң алқишиға сазавәр болған. Қ. Розийева бу байрамдин чоң қаттиқ тәсирләнгән балилар, ата-анилар вә униң башқиму қатнашқучилириниң қәлбидә һәқиқәтәнму шатлиқ садасиниң яңриғанлиқини алаһидә тәкитлиди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт