Түркийәниң қәйсәри, әнқәрә вә башқа шәһәрлиридики уйғурлар қурбан һейтни хушал-хурам өткүзди

Ихтиярий мухбиримиз әркин тарим
2017-09-04
Share
istanbul-2017-qurban-heyt.jpg Һейтлишиватқан уйғурлар қурбанлиқ қойниң гөшлиридин еғиз тәгмәктә. 2017-Йили 3-сентәбир, истанбул.
RFA/Erkin Tarim

Бүгүн дүшәнбә күни, ислам дунясиниң әң чоң һейтлиридин бири болған қурбан һейтниң төтинчи күни.

Түркийәдә бу йил қурбан һейти намизи, йәни 9-айниң 1-күни оқулған иди. Түркийә һөкүмити бу йил һейтта 10 күн тәтил қоюп берилгәнликини җакарлиған иди. Түркийәдә милйонлиған кишиләр өз юртлириға қайтип уруқ-туғқанлири билән җәм болуп, һейт намизи оқуп, аләмдин өткән йеқинлириниң қәбриси бешида дуа қилип, қурбанлиқ қойларни союватқан шу пәйтләрдә, түркийәдики уйғурларму уйғурларниң әнәниси бойичә миллий кийимлирини кийип, қурбанлиқлирини союп, бурун аләмдин өткәнләрниң қәбрисигә берип зиярәт қилип, һейт өткүзүватиду.

Биз түркийәниң әнқәрә, қәйсәри вә башқа шәһәрлиридә яшаватқан бир қисим уйғурлар билән сөһбәт елип берип, уларниң һейт өткүзүш әһвалини игилидуқ. Улар, қурбан һейтни хушал-хурам өткүзүватқанлиқини, әмма вәтәндики уруқ-туғқанлириға алақә орниталмиғанлиқидин көңүллириниң бәкла йерим икәнликини тәкитләшти.

Қәйсәридә паалийәт елип бериватқан шәрқий түркистан мәдәнийәт вә һәмкарлиқ җәмийити муавин рәиси әмруллаһ әфәндигил әпәнди, бурун кәлгән уйғурлар билән 2014-2015-йиллири тайланд вә малайшия арқилиқ кәлгән уйғурлар бир йәргә җәм болуп, һейт намизи оқуғанлиқи, намаздин кейин қәбристанлиқларни зиярәт қилип, өзара һейтлишип бирлик иттипақлиқ ичидә өткүзгәнликини баян қилди.

Әмруллаһ әфәндигил әпәнди қәйсәригә өзлириниң 1964-йили кәлгәнликини, 2014-2015-йили кәлгән уйғурларни қошқанда икки мәһәллә уйғур барлиқини, бу уйғур топлириниң уйғурларниң өрп-адәтлирини изчил һалда давамлаштуруп келиватқанлиқини баян қилди.

Әмруллаһ әфәндигил әпәнди қәйсәридики уйғурлар хушал-хурамлиқ ичидә һейт өткүзүватқан болсиму һәммисиниң вәтән һәсритидә көңли йерим икәнликини тәкитлиди.

Биз бүгүн, йәни һейтниң биринчи күни мусапир уйғурларниң һейт әһвали тоғрисида мәлумат игиләш үчүн уйғур мусапирлар биләнму телефон сөһбити елип бардуқ. Улар әркин дуняда қурбан һейтни яхши өткүзүватқанлиқини, әмма йүрәклириниң вәтәндики уруқ-туғқанлирини сеғиниш отида көйүватқанлиқини, көңүллириниң наһайити йерим икәнликини тәкитләшти.

Түркийәниң пайтәхти әнқәрәдә хотән әмири мәмәт әмин буғра, уйғур тарихчи һаҗи яқуп анат вә пенсийәгә чиққан уйғур генерал, шәрқий түркистан вәхпиниң сабиқ рәиси мәрһум мәмәт риза бәкинләрниң мазири бар шәһәр болуп, әнқәрәдики уйғурлар һейтниң биринчи күни қәбрә бешиға берип дуа қилип, уларни хатирилигәндин кейин қурбанлиқлирини союп һейтлишишқа башлиған. Журналист миркамил қәшқәрли әпәнди бу һәқтә мәлумат берип мундақ деди:
Қәйсәригә йеңи кәлгән уйғурлардин волқан әпәнди түркләрниң уйғур мусапирларға ярдәм қилғанлиқини, түркләргә рәһмәт ейтидиғанлиқини баян қилди.

Волқан әпәнди әркин дуняда қурбан һейти яхши өткән болсиму көңлиниң йерим икәнликини баян қилди.

Түркийәниң қәйсәри шәһиридә һазир икки уйғур мәһәллиси бар болуп, буларниң бири 1964-йили түркийәниң қәйсәри шәһири әхмәт йәсәвий мәһәллисигә җайлаштурулған уйғурлардин тәркиб тапқан мәһәллә, йәнә бири болса 2013-2014 йиллирида малайшия вә тайланд арқилиқ кәлгән уйғурлар турушлуқ бәлсин дөләт қорусидур. Бу йәрдики уйғурларниң сани һазир 2 миңдин ешип кәткән. Әнқәрәдә дөләт идарилиридә хизмәт қилған уйғурлар билән уйғур оқуғучилар бар болуп, уларму уйғур өрп-адәтлири бойичә қурбан һейтини өткүзмәктә.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.