Уйғур рәссам мәрвайит һапиз германийә падишаһлиқ сарийида рәсим көргәзмиси ачти

Ихтиярий мухбиримиз әркин тарим
2018-09-17
Елхәт
Пикир
Share
Принт
явропадики уйғур рәссам мәрвайит һапиз ханимниң германийә мюнхен шәһиридики падишаһлиқ сарийиниң һойлисидики бир көргәзмиханида өткүзгән рәсим көргәзмисидин көрүнүш. 2018-Йили сентәбир.
Явропадики уйғур рәссам мәрвайит һапиз ханимниң германийә мюнхен шәһиридики падишаһлиқ сарийиниң һойлисидики бир көргәзмиханида өткүзгән рәсим көргәзмисидин көрүнүш. 2018-Йили сентәбир.
RFA/Erkin Tarim

Явропадики уйғур рәссам мәрвайит һапиз ханим германийәниң мюнхен шәһиридики падишаһлиқ сарийиниң һойлисидики бир көргәзмиханида рәсим көргәзмиси ачти.

Мәзкур рәсим көргәзмиси 9-айниң 13-күнидин 18-күнигичә бир һәптә давамлишидиған болуп, көргәзмидә 2 герман рәссамниң рәсимлири билән уйғур рәссам мәрвайит һапиз ханимниң 28 парчә май бояқ рәсими қоюлған. Мәзкур 28 парчә рәсимдә уйғур хәлқиниң иҗтимаий турмуши, тарихи вә өрп-адәтлири әкс әттүрүлгән.

Рәссам мәрвайит һапиз ханим 22 йилдин буян явропада рәсим иҗадийити билән шуғуллиниватқан болуп, кәспий мутәхәссисләрниң ейтишичә, у уйғурларниң иҗтимаий турмушини вә тарихини әкс әттүридиған қоюқ миллий пураққа игә май бояқ рәсимлирини сизишта явропада көзгә көрүнгән икән.

Биз нәқ мәйданға телефон қилип, германийәдә туруватқан тонулған рәссам мәрвайит һапиз ханим вә униң мюнхенда өткүзгән рәсим көргәзмисини зиярәт қилған бир қисим уйғурлар билән сөһбәт өткүздуқ.

Төт күндин бери мюнхенда мәхсус рәсим көргәзмисини ечиватқан рәссам мәрвайит һапиз ханим бу қетимлиқ көргәзмиси ечилған җай саяһәт райони болғачқа нурғун кишиниң буни екскурсийә қиливатқанлиқини баян қилди.

Мәрвайит һапиз ханимниң бу қетимлиқ көргәзмигә қойған 28 парчә рәсимидә уйғур хәлқиниң күндилик турмуши, өрп-адәтлири вә тарихий әнәнилири инчикилик билән тәсвирләнгән.

Мәлум болушичә, германийәниң мюнхен шәһири уйғурлар әң көп олтурақлашқан шәһәрләрдин бири һесаблиниду. 6 Күн давамлашқан бу рәсим көргәзмисигә йәрлик немислардин (германлардин) сирт йәнә чәтәллик саяһәтчиләр вә германийәдә яшаватқан бир қисим уйғурларму иштирак қилған. Улар рәсимләрни көргәндин кейинки өзлириниң биваситә һес-туйғулирини баян қилишти. Германийәдики дуня уйғур қурултийи хадимлиридин шәһризат ғәйрәт ханим, мәрвайит һапиз ханим сизған рәсимләрни көрүп бәкла тәсирләнгәнликини, өзиниң уйғурлуқидин пәхирләнгәнликини вә уйғурларниң иҗтимаий турмуши әкс әттүрүлгән бир рәсим сетивалғанлиқини, баян қилип өтти.

Бүгүн, йәни 17-сентәбир күни мюнхендики рәсим көргәзмисини зиярәт қилғучилар ичидә уйғур паалийәтчи дилнар хәзнәчи ханимму бар болуп, у мәзкур көргәзмини екскурсийә қиливатқанлиқини, кишиләрниң уйғурларниң һазирқи вәзийити тоғрисида соаллар сориғанлиқини, мәрвайит һапиз ханимниң 22 йилдин бери германийәдә рәсим сәнити арқилиқ уйғур мәдәнийитини вә уйғурларниң сиясий вәзийитини тонуштуруп келиватқан тонулған сәнәтчи икәнликини баян қилди.

Мәрвайит һапиз ханим 2018-йили 4-айниң 1-күнидин 4-күнигичә 23 герман рәссам билән бирликтә рәсим көргәзмиси ачқан болуп, буни көп санда киши екскурсийә қилған. Көргәзмә җәрянида өзи бастурған рәсим каталогиниму сатқан. У, 23-сентәбир күни германийәниң мюнхен шәһиридә өзиниң мәхсус рәсим көргәзмисини ачидикән.

Пикирләр (0)
Share
Толуқ бәт