Polat alemdar Uyghurlargha salam yollidi

Köp qisimliq “Böriler wadisi” filimining bash rolini oynawatqan nejati shashmaz ramizan éyi munasiwiti bilen Uyghurlargha salam yollidi. Dunyaning her qaysi jaylirida yashawatqan Uyghurlar istanbulgha yoli chüshkende körüshüshni arzu qilidighan sen'etchilerdin biri nejati shashmaz, yeni filimdiki ismi bilen polat alemdar. U 27-iyul küni kech amérika Uyghur jem'iyitining idare hey'et ezasi ablikim idris, sherqiy türkistan wexpi bash katipi jélil turan we Uyghur ziyaliysi abduréshit abdulxemit qatarliq kishiler bilen uchrashti. Istanbulning nishantéshi mehellisidiki pana filim shirkitining ishxanisida élip bérilghan bir sa'etlik uchrishish axirlashqandin kéyin ablikim idris ependi bizge téléfon qilip, nejati shashmaz ependining Uyghurlargha yollaydighan salimini erkin asiya radi'osi arqiliq yetküzüshimizni telep qildi. Biz nejati shashmaz ependi bilen téléfon söhbiti élip barduq.

U aldi bilen Uyghurlargha salam yollighandin kéyin dunyada zulum tügigiche “Böriler wadisi” filimining dawamlishidighanliqini bayan qilip mundaq dédi:
Men nejati shashmaz, istanbuldin sherqiy türkistan'gha ching könglümdin salam yollaymen. Radi'o dolqunliri arqiliq siler bilen uchrashtim. Öyliringlarda tor arqiliq “Böriler wadisi” filimini körüwatisiler, alla razi bolsun. “Böriler wadisi” filimini körüshke dawam qilinglar. Xudayim buyrusa “Böriler wadisi” filimi dawamlishidu. Dunyada zulum we bésim tügigiche “Böriler wadisi” filimimu tügimeydu. Biz her da'im zulumgha qarshi turimiz. Insanlarning zulumgha bésimgha qarshi chiqishi kérek.

U radi'o dolqunliri arqiliq Uyghurlarning ramzan éyini mubarekleydighanliqini bayan qilip mundaq dédi:
“Ramizan éyi munasiwiti bilen sherqiy türkistandiki pütün qérindashlirimgha, dostlirimgha, chonglirimgha, kichiklirimge hörmitimni we salimimni yollaymen. Ramizan éyinglar mubarek bolsun. Xuda silerge yar yölek bolsun!.

Biz bu uchrishish heqqide téximu tepsiliy melumat élish üchün amérika Uyghur jem'iyitining bashqurush hey'iti ezasi ablikim idris ependi bilen söhbet élip barduq. U polat alemdarning Uyghurlar toghrisida melumati barliqini, Uyghurlargha nahayiti bek qiziqidighanliqini dédi.