Америка уйғур җамаити рабийә қадир ханим тәвәллутиниң 70 йиллиқини қутлиди

Мухбиримиз әзиз
2016-12-12
Share
rabiye-xanim-tughulghan-kun-1.jpg Уйғурларниң мәниви аниси рабийә қадир ханим, 70 йиллиқ тәвәллути үчүн мәхсус буйрутулған тортни кәсмәктә. 2016-Йили 11-декабир, вашингтон.
Photo: RFA

11-Декабир күни америкиниң пайтәхти вашингтон вә униңға йеқин җайлардики уйғурлар бир йәргә җәм болуп, Уйғурларниң мәниви аниси рабийә қадир ханим туғулғанлиқиниң 70 йиллиқини тәбриклиди Һәмдә униңға гүлдәстиләр тәқдим қилиш арқилиқ өзлириниң рабийә ханимға болған иззәт һөрмитини ипадилиди.

Йәкшәнбә кәчқурун вашингтон әтрапида йеңидин ечилған уйғур ресторанлиридин "аманниса хан ресторани" қайнам ташқинлиққа толған болуп, топ -топ болушуп келиватқан уйғур җамаити бу җайда бир тәнтәнилик мурасимниң болидиғанлиқидин бешарәт бәрмәктә иди. Дәрвәқә шу күни вашингтон шәһири һәмдә вирҗинийә вә марийланд штатидин топланған уйғур җамаити бир йәргә җәм болуп, уйғур миллий һәрикитиниң рәһбири, уйғурларниң мәниви аниси рабийә қадир ханим дуняға кәлгәнликиниң 70 йиллиқини тәбриклимәктә иди.

Паалийәтниң әзиз меһмини болған рабийә ханим вә униң өмүрлүк һәмраһи сидиқ һаҗи рози достлириниң һәмраһлиқида мурасим залиға кирип кәлгәндә пүтүн залдикиләр гүлдүрас алқиш садалири һәмдә қизғин қучақлишишлар арқилиқ һөрмәт билдүрди. Рабийә қадир ханимму меһманлар билән бир-бирләп көрүшти һәмдә өз миннәтдарлиқини ипадилиди.

"аманниса хан ресторани" бүгүнки тәбрик соруни үчүн алаһидә тәйярлиған йигирмә нәччә хил уйғур таамлири рәңдар вә нәпис шәкли, шундақла өзгичә тәми билән сорунниң кәйпиятиға йеңичә түс қошқан иди. Меһманлар өчирәт болуп таамларға еғиз тәккәч өзара қизғин сөһбәттә болди.

Меһманлар асасән топлинип болғанда рабийә ханимниң шәрипигә йиғилған меһманларға вакалитән униң узун йиллиқ сәбдашлиридин язғучи абликим бақи сөзгә чиқип рабийә ханимниң һаятини қисқичә әсләп өтти.

Шуниң билән биргә абликим бақи өзи йезип чиққан, рабийә ханимға беғишланған икки парчә әсәрниң түркийә дөләтлик нәшриятида түркчә вә уйғурчә тилларда нәшр қилинғанлиқини ейтқанда пүтүн залдикиләр алқиш яғдурди. Арқидинла у рабийә ханимниң милләтчилик вә дөләтчилик һәққидики нутуқлири вә баянлири асасида вуҗудқа чиққан әсәрниң рабийә ханимниң тунҗи китаби сүпитидә нәшр қилинғанлиқидин мәлумат бәргәндә сорун әһли бу хош хәвәрни қизғин тәбриклиди.

Арқидин сорун риясәтчиси гүлчеһрә рабийә ханимниң қәдинаслиридин хуршидә ханимниң аяллар топидики достлириға вакалитән тәйярлиған гүлдәстини сорун әһли намидин рабийә ханимға тәқдим қилидиғанлиқини елан қилғанда залдикиләр йәнә бир қетим алқиш яғдурди. Арқидин меһманлар бәс-бәстә уссулға чүшүп бу хушаллиқ минутлиридин бирликтә бәһриләнди.

Меһманлар уссулдин тохтиғанда рабийә ханим сөзгә чиқип, уйғур җамаитиниң бу һиммитигә болған тәшәккүрини ипадилиди. У сөзидә бу қетимқи паалийәтниң тарих бетидә бир сәһипә болуп қелишини үмид қилидиғанлиқини билдүрди.

Арқидинла америка уйғур җамаити рабийә ханимниң көп йиллиқ уйғур давасиға сиңдүргән әҗри, шундақла уйғур давасиниң хәлқаралишишида ойниған һәл қилғуч ролиға тәшәккүр билдүрүш йүзисидин униңға ләвһә тәқдим қилди. Нәпис ләвһә йүзигә чекилгән уйғурчә текист үнлүк оқулғанда сорун әһли йәнә бир қетим һаяҗанға чөмди.

Бу қетимқи қутлуқ сорунға қәдәм тәшрип қилған сидиқ һаҗи розиму өз нөвитидә сөз елип уйғур давасиниң мүшкүллүккә вә риязәткә толған бир йол болсиму киши пәхирләнгүдәк шәрәпкә игә икәнликини тәкитлиди.

Ахирида сорун әһли рабийә қадир ханимниң 70 яшлиқ тәвәллутиға атап тәйярлиған чоң торт елип келинди, уйғур җамаити өзлириниң рабийә ханимға болған сәмимий тиләклирини билдүргәч бәс-бәстә униң билән хатирә сүрәткә чүшти. Паалийәт қизғин тиләкләр вә сәмимий хошлишишлар ичидә көңүллүк ахирлашти.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт