Uyghur akadémiyesi Uyghur medeniyet tetqiqati boyiche ilmiy muhakime yighini ötküzmekchi

Ixtiyariy muxbirimiz erkin tarim
2017-11-05
Élxet
Pikir
Share
Print
Uyghur akadémiyesi istanbulda achmaqchi bolghan "Uyghur medeniyiti xelq'ara ilmiy muhakime yighini" ning élani.
Uyghur akadémiyesi istanbulda achmaqchi bolghan "Uyghur medeniyiti xelq'ara ilmiy muhakime yighini" ning élani.
RFA/Erkin Tarim

Merkizi istanbuldiki Uyghur akadémiyesi bilen ibin xeldun uniwérsitéti birlikte tunji qétim Uyghur medeniyiti toghrisida ilmiy muhakime yighini ötküzmekchi.

"Uyghur medeniyet tetqiqati ilmiy muhakime yighini" 11-we 12-noyabir künliri istanbuldiki fatih sultan memet wexpi uniwérsitétida ötküzülidighan bolup, Uyghur akadémiyisining türkiyede tunji qétim Uyghur medeniyiti témisida xelq'araliq ilmiy muhakime uyushturushi iken. 

Uyghur akadémiyisining re'isi ablimit qaraxan ependi her yili bir qétim ötküzüp kéliwatqan Uyghur edib, pen tetqiqatchiliri we mutexessisler uchrishishining 9-qétimliqini mexsus Uyghur medeniyet tetqiqatigha béghishlighanliqini, yighin'gha Uyghur we türk tetqiqatchilardin 20 kishining ilmiy doklat béridighanliqini bayan qildi.

Ablimit qaraxan ependi, bu yighinning meqsiti heqqide toxtilip, xitay Uyghur tili we medeniyitini yoq qilishqa urunuwatqan bügünki künde Uyghur akadémiyisining mezkur ilmiy yighin arqiliq Uyghurlarning bay medeniyetke ige bir millet ikenlikini tekitlimekchi bolghanliqini bayan qildi.

Naxsha-usul, kiyim-kéchek we xettatliq qatarliqlarmu Uyghur medeniyitining muhim bir terkibiy qismi bolup, ablimit qaraxan ependi, mezkur ilmiy muhakime yighini jeryanida Uyghur ziyaliysi doktor perhat qurban tengritaghli ependi, doktor gülzade tengritaghli xanim we tonulghan türk sen'etchi bunyamin aqsunggur qatarliq kishilerning Uyghur naxsha-usulliridin örnekler körsitidighanliqini, yighin jeryanida Uyghur medeniyiti eks ettürülgen körgezme échilidighanliqini bayan qildi.

Izmirdiki ege uniwérsitétining proféssori, Uyghur akadémiyisining sabiq re'isi, doktor alimjan inayet ependi istanbulda chaqirilmaqchi bolghan mezkur ilmiy muhakime yighinining türkiyede mexsus Uyghur medeniyet tetqiqatliri toghrisida chaqirilghan tunji yighin ikenlikini, mezkur yighinda Uyghur medeniyitining yiltizi, islamiyettin burunqi we kéyinki tereqqiyat ehwali, yéqinqi zaman Uyghur medeniyitining ichki we tashqi amilliri we méxanizmi heqqide teyyarlan'ghan maqalilerning oqulidighanliqini bayan qildi.

Proféssor alimjan ependi bu xil tetqiqat we ilmiy muhakime yighinlirining Uyghur milliy kimlikini qoghdap qélish üchün zor ehmiyetke ige ikenlikini bayan qildi.

Uyghur akadémiyisining bash katipi batur qaraxan ependi, Uyghur medeniyiti toghrisidiki mezkur yighin'gha istanbuldiki Uyghur ziyaliyliri we herqaysi uniwérsitétlarda oquwatqan Uyghur oqughuchilarning kélip qatnishishini iltimas qildi. 

Merkizi istanbuldiki Uyghur akadémiyesi 2009-yili 9-ayning 9-küni qurulghan. Ötken 8 yil ichide türkiyede 24 qétim, amérikida 1 qétim ilmiy muhakime yighini chaqirghan. Istanbulda 13 qétim doklat bérish yighini uyushturghan.

Toluq bet