Әнқәрәдә «йеңи йипәк йоли вә уйғурлар» намлиқ юмилақ үстәл йиғини өткүзүлди

Ихтиярий мухбиримиз әркин тарим
2018-11-23
Елхәт
Пикир
Share
Принт
Әнқәрәдә өткүзүлгән «йеңи йипәк йоли вә уйғурлар» намлиқ юмилақ үстәл йиғинидин көрүнүш. 2018-Йили 23-ноябир.
Әнқәрәдә өткүзүлгән «йеңи йипәк йоли вә уйғурлар» намлиқ юмилақ үстәл йиғинидин көрүнүш. 2018-Йили 23-ноябир.
RFA/Erkin Tarim

Хитай пүтүн күчи билән түркийәдә өзиниң «бир йол бир бәлвағ» қурулушини тәшвиқ қиливатқан бүгүнки күндә әнқәрәдики уйғур тәтқиқат инистити «йеңи йипәк йоли вә уйғурлар» мавзулуқ юмилақ үстәл йиғини өткүзди.

23-Ноябир күни мәзкур институтниң ишханисида өткүзүлгән бу паалийәткә дуня уйғур қурултийиниң сабиқ рәиси әркин алиптекин әпәнди, шәрқий түркистан тәшкилатлар бирликиниң рәиси һидайәтуллаһ оғузхан әпәнди, шәрқий түркистан вәқпиниң баш катипи доктор өмәр қул әпәнди, уйғур академийәсиниң рәиси профессор алимҗан инайәт әпәнди, уйғур академийәсиниң иҗраийә һәйити рәиси аблимит қарахан әпәнди, уйғур өлималар бирликиниң әзаси сираҗидин әпәнди, тәклимәкан уйғур нәшриятиниң башлиқи абдуҗелил туран әпәнди вә уйғур тәтқиқат институтиниң хадимлири иштирак қилди.

Уйғур тәтқиқат институтиниң мудири доктор әркин әкрәм риясәтчилик қилған юмилақ үстәл йиғинида «йеңи йипәк йоли» ниң һазирқи әһвали вә уйғурларниң һазирқи вәзийити тоғрисида муһакимиләр елип берилди. Андин шәрқий түркистан тәшкилатлириниң хитайниң бу қурулушиниң райондики дөләтләргә вә уйғурларға елип келидиған зийинини чүшәндүрүш үчүн немиләрни қилиши керәклики тоғрисида музакирә елип берилди.

Алди билән доктор әркин әкрәм әпәнди сөз қилип, йеңи йипәк йолиниң уйғурларниң тәқдири билән зич мунасивәтлик икәнликини, шуңа бундақ бир темида йиғин чақирғанлиқини баян қилди.

Бәзи уйғур мутәхәссисләр хитайниң 2013-йили «йеңи йипәк йоли» қурулушини дуняға җакарлиши билән уйғурларға болған бесим сияситиниң күчәйгәнликини тилға алди. Ундақта, «йеңи йипәк йоли» дегән зади немә? доктор әркин әкрәм ечилиш нутқида бу һәқтә чүшәнчә берип өтти.

Икки йерим саәт давамлашқан йиғинда һәрқайси аммиви тәшкилатларниң мәсуллири вә мутәхәссисләр «йеңи йипәк йоли» ниң уйғурларға елип

Келидиған хәвплири вә мәзкур хәвпни дуня җамаәтчиликигә аңлитишниң йоллири тоғрисида музакирә елип барди. Профессор алимҗан инайәт әпәнди «йипәк йоли-әҗдәрһа йоли» шоарини көтүрүп чиқип, хитайниң бу кеңәймичилик сияситини дуняға аңлитиш зөрүрлүкини баян қилди.

Йиғин ахирлашқандин кейин соалимизға җаваб бәргән һидайәтуллаһ оғузхан әпәнди әнқәрәдә чақирилған «йеңи йипәк йоли вә уйғурлар» мавзулуқ юмилақ үстәл йиғининиң әһмийәтлик бир йиғин болғанлиқини баян қилди.

Биз микрофонимизни д у қ ниң сабиқ рәиси әркин алиптекин әпәндигиму узаттуқ. У йиғинда муһим мәсилиләрниң музакирә қилинғанлиқини, көплигән пайдилиқ пикирләрниң оттуриға чүшкәнликини тилға алди.

Уйғур тәтқиқат институти әнқәрәдики уйғур зиялийлири тәрипидин 2018-йили қурулған болуп, бу институт уйғурлар тоғрисида доклат һазирлаш, тор бетидә уйғурлар һәққидә мақалә елан қилиш вә илмий доклатларни уюштуруш паалийәтлири билән шуғулланмақта.

Пикирләр (0)
Share
Толуқ бәт