Қарақаш от өчүрүш әтрити: икки мәйдан от кетиш вәқәси йүз бәрди, бири чоң базарда

15-январ күни иҗтимаий таратқуларда хотәндә бир орунға от кәткәнлики һәққидә көрүнүшлүк учур тарқалди, учурдики ғәйрий рәсмий чүшәндүрүштә вәқәниң қарақаш наһийәсидики бир тәрбийәләш мәркизидә йүз бәргәнлики тилға елинған. Мухбиримиз шөһрәт һошурниң бу һәқтә әһвал ениқлиши давамида, қарақаш наһийәлик от өчүрүш әтритиниң хадими қарақашта дүшәнбә күни икки мәйдан от апити йүз бәргәнлики, бириниң абдурахман мәмтимин исимлик бир аһалиниң өйи икәнлики, йәнә бириниң болса қарақаш чоң базарда йүз бәргәнликини баян қилди. Мәзкур хадим һәр икки вәқәдә адәм өлүш болмиғанлиқини илгири сүрсә, йәнә бәзи хадимлар, немә үчүндур бу от кетиш вәқәсиниң йүз бәргәнликини йошурди яки җаваб бериштин өзини қачурди.

Иҗтимаий таратқуларда қарақаш наһийәсидә от апити йүз бәргәнлики һәққидә учур тарқалғандин кейин, йезилиқ сақчиханиларға телефон қилдуқ. Сақчихана хадимлири омумйүзлүк һалда һәрқандақ бир от апитидин хәвәрсизликини ейтти. Қарақаш наһийәлик орман сақчиханисиниң хадимиму, от апитидин пүтүнләй хәвәрсизликини ейтти. Биз арқидин қарақаш наһийәлик от өчүрүш әтритигә телефон қилдуқ. Телефонимизни қобул қилған хадим түнүгүн йәни дүшәнбә күни икки мәйдан от апити йүз бәргәнликини ашкарилиди. Униң баян қилишичә, дүшәнбә күни кәч саәт 9:30 әтрапида қарақаш “дабаза” ға от кәткәнлики һәққидә учур кәлгән. От өчүрүш әтрити апәт мәйданиға кетиватқан чеғида, йәни йерим йолға кәлгәндә отниң тизгинләнгәнлики, от өчүрүш әтритиниң келишигә һаҗәт йоқлуқи уқтурулған. Йәнә бу хадимниң баян қилишичә, азрақ мәзгилдин кейин бир мәйдан от апитидин учур кәлгән.

Әмма мухбиримиз гүлчеһрәгә учур бәргән бир муһаҗир уйғурниң, йәни қарақаш вәзийитидин хәвәрдар бир кишиниң баян қилишичә, мәзкур от вәқәси қарақаш наһийә базириниң шималий қисмидики қатнаш бекитиниң йенидики тәрбийәләш мәркизигә өзгәртилгән өстәңбойи мәсчитидә йүз бәргән. Қарақаш наһийәлик от өчүрүш әтритиниң муавин башлиқи рахман исмаил, от апитиниң бир тәрбийәләш мәркизидә йүз бәргәнликини инкар қилди. У дүшәнбә күни қарақашта икки мәйданда от кәткәнлики билдүрүп, икки мәйдандин бириниң бир аһалиниң өйи икәнликини ейтти, әмма немә үчүндур йәнә бир орунниң намини дәп берәлмиди.

От өчүрүш әтрити хадиминиң баян қилишичә, иккинчи мәйдан от кәткән орун, қарақаш базар иккинчи кәнт биринчи гуруппа әзаси абдурахман мәмтиминниң өйи болуп, иккинчи мәйданға 12 от өчүрүш хадими икки машина билән барған вә отни өчүргән, әмма икки қәвәтлик ойниң материяллири яғач болғачқа, өй пүтүнләй көйүп түгигән; йәнә униң әскәртишичә һәр икки мәйдан от кетиштә адәм өлүш вә ярилиниш йүз бәрмигән. Биз торда тарқалған от апити һәққидики учурни вә адәм өлгәнлики һәққидә таратқуларда учур барлиқини әскәрткинимиздә, мәзкур хадим, 1-мәйданға шу тәвәликтики сақчи хадимлириниң барғанлиқи вә шулар тәрипидин өчүрүлгәнликини, тәпсилий әһвалдин җ х тармақлириниң хәвәрдар икәнликини ейтти. У йәнә чоң базардики әһвалниң тәпсилатини уқушимиз үчүн от өчүрүш әтритиниң рәһбәрлири билән алақилишишимизни тәвсийә қилди.

Юқириқи учурлардин қарақашта дүшәнбә күни аз дегәндә икки орунда от апити йүз бәргәнлики, буниң бири аһалиниң өйи икәнлики ениқ; әмма йәнә бириниң болса, тәрбийәләш мәркизи яки чоң базар икәнлики, яки мәзкур тәрбийәләш мәркизиниң чоң базарға тәвә яки йеқин җай икәнлики һазирчә мәлум әмәс.